22 თებერვალს SZA-ს ახალი სინგლი სახელწოდებით Saturn ამერიკული დამოუკიდებელი ხმის ჩამწერი ლეიბლის, Top Dawg Entertainment-ისა და RCA Records-ის მეშვეობით გამოიცა. Სიმღერის დებიუტი გრემის დაჯილდოებაზე, Mastercard-ის რეკლამაში შედგა, სამი კვირის შემდეგ კი სინგლად გამოვიდა. რეკლამა ბუნების დაცვასა და ტყის აღდგენას ეხება: „როდესაც ვიკრიბებით, ჩვენ ბუნების ძალა ვართ, ამიტომ მხარს ვუჭერ Mastercard-ის მისიას, მთელ მსოფლიოში აღადგინოს ტყეები, შემომიერთდით.” – ამბობს SZA რეკლამის დასასრულს.
Mastercard-ის რეკლამა 66-ე ყოველწლიური გრემის დაჯილდოების დროს, 4 თებერვალს გავიდა, რა დროსაც SZA-მ სამი ჯილდო მიიღო: საუკეთესო R&B სიმღერისთვის (Snooze), საუკეთესო პროგრესული R&B ალბომისთვის (SOS) და საუკეთესო პოპ დუეტისთვის ფიბი ბრიჯერსთან ერთად (Ghost in the Machine).
სიმღერა Saturn-ის სცენარი SZA-ს, კარტერ ლანგის, რობ ბაიზელის, Solomonophonic-ის (ჯარედ სოლომონი) და Monsune-ის მიერაა დაწერილი, სადაც მომღერალი იმედგაცრუებულია იმით, რაც სამყაროში ხდება და ფიქრობს, უკეთესი ხომ არ იქნება, ცხოვრება პლანეტა სატურნზე დაიწყოს.
მოისმინეთ SZA-ს სიმღერა Saturn:
