2024 წელს წინანდლის მამულში ბერლინის ფილარმონიული ორკესტრის ტრადიციული ღონისძიება, „ევროპაკონცერტი” გაიმართება. 40 წელია, რაც „ევროპაკონცერტი” ყოველწლიურად ევროპის სხვადასხვა ქალაქში იმართება. მისი იდეა უკავშირდება ორკესტრის დაარსების თარიღს – 1882 წლის 1-ელ მაისს. კონცერტი ყოველწლიურად განსხვავებულ ქვეყანასა თუ ქალაქში იმართება, რომელსაც ორკესტრი თავად ირჩევს.
ფილარმონიული ორკესტრის კონცერტი მაესტრო დანიელ ბარენბოიმის დირიჟორობით 2024 წლის 1-ელ მაისს წინანდლის ამფითეატრში გაიმართება. კონცერტში მონაწილეობას მიიღებს ცნობილი ქართველი მევიოლინე ლიზა ბათიაშვილი.
„ევროპაკონცერტი“ მასშტაბური ღონისძიებაა, რომელიც მსოფლიოს სხვადასხვა ადგილიდან მრავალრიცხოვან აუდიტორიას იზიდავს. ბერლინის ფილარმონიული ორკესტრი, რომელიც ცნობილია თავისი მუსიკოსებითა და დირიჟორებით, მსმენელს გამორჩეულ პროგრამას წარუდგენს. მასში ერთიანდება როგორც კლასიკური, ისე სპეციალურად ამ სერიისთვის შექმნილი ნაწარმოებები. „ევროპაკონცერტი” 140-ზე მეტ ქვეყანაში გადაიცემა, მათ შორის არის ხელოვნებასა და კლასიკურ მუსიკაზე ფოკუსირებული ევროპის წამყვანი ტელევიზიები.
როგორც წინანდლის ფესტივალის გენერალურმა დირექტორმა დავით საყვარელიძემ აღნიშნა, ეს მუსიკალურად და სანახაობრივად ძალიან მნიშვნელოვანი ღონისძიებაა.
დავით საყვარელიძე:
„გარდა დიდი კულტურული და მხატვრული ღირებულებისა, ამ კონცერტს აქვს მაღალი საზოგადოებრივ-პოლიტიკური მნიშვნელობაც, რადგანაც წინანდალში დაგეგმილ კონცერტს წინ საქართველოსთვის ევროკავშირის წევრობის კანდიდატის სტატუსის მინიჭება უძღოდა, რაც საქართველოს ხალხისა და მისი მთავრობის დიდი მონაპოვარია. „ევროპაკონცერტის” ტრანსლაციას გერმანიის უმსხვილესი საზოგადოებრივი ტელევიზია ZDF მოახდენს და ის მსოფლიოს 149 ქვეყანაში გადაიცემა. ვიდეოგადაღებას კულტურისა და ხელოვნების მსოფლიო სატელევიზიო გიგანტი Euroarts.com აწარმოებს. ბერლინიდან ორკესტრი ჩამოფრინდება სპეციალური ჩარტერული რეისით, რომელსაც დოიჩე ბანკი უზრუნველყოფს. კონცერტზე დასასწრებად ჩამოდიან გერმანიის კულტურის მინისტრი, გერმანიის ბუნდესტაგის კულტურისა და განათლების კომიტეტის ხელმძღვანელი, ბერლინის სენატის რამდენიმე მაღალჩინოსანი და ბიზნესსექტორის მნიშვნელოვანი წარმომადგენლები. მათი სტუმრობა ასევე მნიშვნელოვანი მოვლენაა ჩვენი ქვეყნისთვის. ეს ღონისძიება მუსიკალური დიპლომატიის კარგ მაგალითად და საქართველოს კულტურული ევროინტეგრაციის გამორჩეულ სიმბოლოდ გვესახება.”
26 თებერვალს ბერლინში წლევანდელ „ევროპაკონცერტს” პრეს-კონფერენციაზე დააანონსებენ, რომელსაც ქართველი ორგანიზატორების მხრიდან დავით საყვარელიძე ესწრება.
