ფრანგული სტრიმინგ კომპანია „დიზერის” შემოსავალი 2023 წლის მეოთხე კვარტალში 12.1%-ით გაიზარდა და 130.7 მილიონი ევრო შეადგინა. მთელი წლის შემოსავალი კი 484.7 მილიონი ევრო გახდა, რაც წლიური 7.4%-იანი ზრდაა. წელს კომპანიაში იმედოვნებენ, რომ წლიურ 10%-იან ზრდას და 533 მილიონი ევროს შემოსავალს მიაღწევენ.
2022 წლის ბოლოს „დიზერის” გამომწერთა რაოდენობა 11.5%-ით გაიზარდა – 9.4 მილიონიდან 10.5 მილიონამდე. მთელი ეს ზრდა კომპანიის ახალი B2B (business-to-business) პარტნიორობების დამსახურებაა. გასულ წელს „დიზერმა” ახალი პარტნიორობა წამოიწყო აუდიოკომპანიასთან Sonos, მედიაკომპანიასთან RTL გერმანიაში და e-commerce კომპანიასთან Mercado Libre ბრაზილიასა და მექსიკაში. ასევე განაახლა პარტნიორობა მობილურ ოპერატორთან TIM ბრაზილიაში, მობილურ ოპერატორთან Orange საფრანგეთში და სავაჭრო ქსელთან Fnac Darty საფრანგეთში.
კომპანიამ ასევე განაცხადა, რომ მისი CEO ჯერონიმო ფოლგეირა, რომელიც პოსტს 2021 წლიდან იკავებს, თანამდებობას ტოვებს. სწორედ ფოლგეირას ხელმძღვანელობის დროს გახდა „დიზერი” საჯარო კომპანია და დაიწყო პარტნიორობა Universal Music Group-თან.
გაიზარდა „დიზერის” წილის ფასიც, კერძოდ 0.5%-ით და 2.18 ევრო შეადგინა. ეს თითქმის გაორმაგებული რიცხვია 2023 წლის ყველაზე დაბალ მაჩვენებლთან შედარებით (1.19 ევრო აპრილში), თუმცა დაბალია 2023 წლის ყველაზე მაღალ მაჩვენებელზე (3.19 ევრო ნოემბერში).
