პოლ საიმონის თაყვანისმცემლები მალე თავიანთი საყვარელი მუსიკოსის სამოცდაათწლიანი კარიერის დეტალებს ფილმში In Restless Dreams: The Music of Paul Simon ნახავენ. ორნაწილიანი დოკუმენტური ფილმის სატელევიზიო პრემიერა მარტში შედგება.
„მეუბნებოდნენ ხოლმე: შენ პულსზე გიდევს თითი,” – ამბობს ფილმის ტრეილერში პოლ საიმონი. „არა, მე არ მიდევს თითი პულსზე, მე უბრალოდ თითი მაქვს, რომლის ქვეშაც პულსი სცემს.” ფილმის პრემიერა შარშან ტორონტოს საერთაშორისო კინოფესტივალზე შედგა. ახლა კი მას ფართო აუდიტორია MGM+-ზე ორ ნაწილად, 17 და 24 მარტს იხილავს.
ფილმი მოიცავს მუსიკოსის აქამდე უცნობ კადრებს, დაწყებული მისი პირველი დღეებიდან დუეტში Simon & Garfunkel, დასრულებული 1986 წლის ალბომ Graceland-ის მსოფლიო ტრიუმფით. მაყურებელი ასევე ნახავს, თუ როგორ იქმნებოდა საიმონის 2023 წლის ალბომი Seven Psalms.
„არასოდეს მიფიქრია სხვა პროფესიაზე, გარდა მომღერლობის და სიმღერების ავტორობისა“ – აღნიშნავს The Sound of Silence-ის ავტორი. სხვათა შორის, სწორედ ამ სიმღერის ტექსტის ერთ-ერთი ფრაზაა გამოყენებული ფილმის სათაურად (In Restless Dreams).
საიმონისა და გარფანკელის თანამშრომლობით, რომელიც ჯერ კიდევ თინეიჯერობის დროს Tom & Jerry-ის სახელწოდებით დაიწყო, 1960-იან წლებში ათობით ჰიტი და არაერთი ალბომი შეიქმნა. წყვილი 1970 წელს დაიშალა, თუმცა მას შემდეგ მათი თანამშრომლობა რამდენჯერმე კიდევ შედგა ერთჯერად შოუებსა და 1993 წლის მსოფლიო ტურნეში. Მიუხედავად ამისა, პოლ საიმონსა და არტ გარფანკელს ერთობლივი ალბომი აღარ ჩაუწერიათ.
„არტი… ეს ძალიან კარგი მეგობრობა იყო,” – იხსენებს საიმონი არტ გარფანკელს. „ჩვენ ვფიქრობდით, რომ უნდა გამოგვეხატა ის, რასაც ჩვენი თაობა გრძნობდა.”
