ირვინგ აზოფის Iconic Artists Group დიდი კატალოგების მქონე არტისტებთან პარტნიორობას განაგრძობს. სამშაბათს მათ მორიგი შეთანხმების შესახებ განაცხადეს ჯგუფ Roxy Music-ის სოლისტ ბრაიან ფერისთან, რომელიც თავისი კატალოგის ნახევარს სწორედ IAG-ს მიჰყიდის. შეთანხმების ფინანსური დეტალები არ ხმაურდება. კომპანია ამბობს, რომ ცნობილი არტისტის მუსიკალური მემკვიდრეობის ახალ თაობებში განვითარებასა და განვრცობაზე იზრუნებს.
შეთანხმება მოიცავს როგორც ფერის პოპ-ბენდ Roxy Music-ის, ასევე მის სოლო შემოქმედებას, რაც საერთო ჯამში 24 ალბომს შეადგენს. სწორედ ფერის შექმნილია Roxy Music-ის თითქმის ყველა სიმღერა, 1972 წლის დებიუტიდან დაწყებული, ჯგუფის მერვე და ბოლო ალბომით დასრულებული. ბენდის ყველაზე ცნობილი სიმღერებია Love Is the Drug, All I Want Is You, Dance Away, Avalon და More Than This.
ბრაიან ფერის სოლო კარიერა ბენდის არსებობის პარალელურად, 1973-2018 წლებში მიმდინარეობდა. შუალედში ის ერთხელ გახდა დიდი ბრიტანეთის ჩარტის ლიდერი – 1985 წლის ალბომით Boys and Girls, რომელშიც შედის ფერის ერთ-ერთი ყველაზე დიდი ჰიტი Slave to Love.
2019 წელს ფერი როკ-ენ-როლის დიდების დარბაზში შევიდა, როგორც Roxy Music-ის წევრი. Iconic Artists Group-ში, რომლის დამფუძნებლები არიან ირვინგ აზოფი და ოლივერ ჩესტენი, ფერი შეუერთდება დიდების დარბაზის ისეთ წარმომადგენლებს, როგორებიც არიან როდ სტიუარტი, შერი, ჯო კოკერი, დევიდ ქროსბი, გრეჰემ ნეში და სხვები.
„ძალიან მიხარია Iconic-ში მუშაობა, სადაც მსოფლიოსთვის ჩემი მუსიკის გაზიარების ახალ გზებს ვეძებთ. აღტაცებული ვარ იმით, თუ რამხელა შესაძლებლობები იშლება,” – თქვა ბრაიან ფერიმ.
