კანიე უესტმა და Ty Dolla-მ Big Boy-სთან ექსკლუზიურ ინტერვიუში სტუდიურ ალბომ Vultures-ის შესახებ ისაუბრეს და ბევრ სხვა თემასაც შეეხნენ. ინტერვიუში კანიე უესტი Ty Dolla-სთან დუეტის, პირველი სიმღერა Carnival-ისა და მათი გაცნობის შესახებაც საუბრობს. უესტი ინტერვიუში ყურადღებას მუსიკის ახალ მიმდინარეობებზე ამახვილებს და ამბობს, რომ ბოლო ოცი წლის განმავლობაში გამოსული მუსიკალური ჟანრები მისი გამოგონილია. კონკრეტულად კი, როგორც მუსიკოსი მიიჩნევს, The Weeknd-ის, Drake-ის, Future-ის და Young Thug-ის მუსიკას საფუძველი სწორედ მან ჩაუყარა.
„ბოლო ოცი წლის განმავლობაში გამოსული ყველა მუსიკალური სტილი მე გამოვიგონე, ეს ჟანრები მე შევქმენი. მე შევქმენი Weeknd-ის, Drake-ის, Future-ის ჟანრი და ამას მთელი სიყვარულით ვამბობ. მუსიკალურ ინდუსტრიაში სტანდარტი Auto-Tune მე შემოვიტანე.“ – ამბობს კანიე უესტი Big Boy-სთან ინტერვიუში.
ბევრი შეიძლება დაეთანხმოს მის მოსაზრებას, მაგრამ, როდესაც საქმე ვოკალურ ეფექტ Auto-Tune-ს ეხება, არ უნდა დაგვავიწყდეს მუსიკოს T-Pain-ის გახსენება, რადგან მუსიკალურ ინდუსტრიაში სწორედ მან მოახდინა ამ მუსიკალური ეფექტის პოპულარიზაცია.
აღსანიშნავია ისიც, რომ კანიე უესტმა Kid Cudi-ის დამსახურებაც არ აღნიშნა, რომელმაც ჰიპ-ჰოპში ახალი მუსიკალური სტილი დაამკვიდრა. 2008 წელს გამოცემულ კანიე უესტის ალბომ 808s & Heartbreak-ში აშკარად იგრძნობა Kid Cudi-ის გავლენა.
ინტერვიუს დროს კანიე უესტმა განმარტა მიზეზი, თუ რატომ გადაწყვიტა Ty Dolla-სთან ერთად ალბომის გამოშვება, „მილიონმა ადამიანმა უთხრა მას, რომ ჩემ გვერდით არ დამდგარიყო, თუმცა მან მხარი დამიჭირა და გვერდში დამიდგა“. – ამბობს რეპერი.
კანიე უესტი და Ty Dolla პირველად იაპონიის ერთ-ერთ სტუდიაში შეხვდნენ ერთმანეთს, სადაც კანიეს თხოვნით Ty Dolla მისი ალბომის აღმასრულებელ პროდიუსერობას დათანხმდა. პირველი სიმღერა, რომელიც მათ შექმნეს, Band of Thieves-ის სემპლი Burn იყო და სწორედ ამ სიმღერის შთაგონებით გაჩნდა ახალი ალბომის ჩაწერის იდეა.
საბოლოოდ ალბომი Vultures 1 10 თებერვალს გამოიცა. მისი დებიუტი ბილბორდ 200-ის ჩარტებში შედგა და ალბომმა პირველი ადგილი დაიკავა. ალბომის მესამე სინგლი სახელწოდებით Carnival კი ბილბორდის Hot 100-ში პირველ ადგილს იკავებს.
ნახეთ კანიე უესტის და Ty Dolla-ს ინტერვიუ ლეგენდარულ Big Boy-თან.
