კომპანია MGM Resorts International უარყოფს გამოცემა NewsNation-ის მიერ გავრცელებულ ინფორმაციას, თითქოს ბრუნო მარსს 2016 წელს კომპანიასთან გრძელვადიანი რეზიდენტობის კონტრაქტის ხელმოწერის შემდეგ 50 მილიონ დოლარზე მეტი ვალი დაუგროვდა.
„ჩვენ ბრუნო მარსთან ურთიერთობით ვამაყობთ, ის მსოფლიოს ერთ-ერთი ყველაზე ამაღელვებელი და საოცარი შემსრულებელია. MGM-ისა და ბრუნო მარსის პარტნიორობა ხანგრძლივია და იგი ურთიერთპატივისცემაზეა დაფუძნებული. ნებისმიერი სპეკულაცია ჩვენთვის მიუღებელია და ჭეშმარიტებას არ ეფუძნება. MGM მოხარულია, რომ ჩვენ ერთად ვაგრძელებთ სტუმრებისთვის დაუვიწყარი და შთამბეჭდავი გამოცდილების გაზიარებას“, – ნათქვამია კომპანიის განცხადებაში.
აღსანიშნავია, რომ ბრუნო მარსის სოლო ალბომი 2016 წელს გამოვიდა და მისი სახელწოდებაა 24K Magic. ალბომში ისეთი ჰიტებია შესული, როგორებიცაა That’s What I Like და Versace on the Floor. სიმღერა That’s What I Like ბილბორდის საუკეთესო ასეულში რამდენიმე კვირის განმავლობაში ლიდერობდა. ბილბორდ 200-ში კი ალბომმა მეორე ადგილი დაიკავა.
ბრუნო მარსისა და ანდერსონ პააკის ერთობლივი ალბომი Silk Sonic 2021 წელს გამოვიდა. ალბომის გამორჩეულმა სინგლმა Leave the Door Open ოთხი გრემი მიიღო – წლის სიმღერის, წლის ჩანაწერის, საუკეთესო R&B სიმღერისა და საუკეთესო R&B შესრულების ნომინაციებში.
