21 მარტს რუსთაველის თეატრის სცენაზე მსმენელის წინაშე საერთაშორისო აღიარებული ქართველი მუსიკოსი, ჯაზ-პიანისტი ბექა გოჩიაშვილი წარდგა. საღამოში მონაწილეობა მიიღეს: ლევან დეისაძემ (ბას-გიტარა), ზაზა ცერცვაძემ (დრამი) და კონცერტის სპეციალურმა სტუმარმა – ლაშა დეისაძემ (გიტარა). კონცერტის წარმდგენი იყო ხელოვანთა გაერთიანება „კონცეპტArt”.
ბექას შემოქმედებაში 2023 წელი ბევრი სიახლით აღინიშნა. მან მსოფლიო საკონცერტო ტური გამართა „გრემის“ მრავალგზის მფლობელ მუსიკოს სტენლი კლარკთან ერთად. ბექა გოჩიაშვილი ამჟამად კვლავაც მსოფლიო ტურნესათვის ემზადება. რუსთაველის თეატრში გამართული კონცერტი აღსანიშნავია მუსიკალური პროგრამით – მუსიკოსმა შეასრულა კომპოზიციები, რომლებიც აქამდე სცენაზე არ გაჟღერებულა.
Billboard Georgia კონცერტის გენერალურ რეპეტიციას ესწრებოდა და მუსიკალური საღამოს დაწყებამდე ბექა გოჩიაშვილთან ინტერვიუ ჩაწერა.
ბექა გოჩიაშვილი:
„ამ კომპოზიციებიდან მხოლოდ ერთი ან ორი თუ დამიკრავს. შეიძლება ითქვას, რომ დღეს ამ ნამუშევრების პრემიერაა. დღეს სცენაზე დავუკრავ ლევან დეისაძესთან, ზაზა ცერცვაძესთან და ლაშა დეისაძესთან ერთად. ესენი არიან მუსიკოსები, რომლებსაც შემოქმედებითად სრულად ვენდობი. ჩემთვის მნიშვნელოვანია ეს ადგილი – თეატრთან გამორჩეული ისტორია მაკავშირებს. 2013 წელს „სილქროუდ ჯგუფის” ხელშეწყობით ამ სცენაზე ჩემი მეორე ალბომის პრეზენტაცია გაიმართა DJ Logic-თან ერთად. ამიტომ, ბუნებრივია, რომ აქ ჩემთვის განსაკუთრებული გარემოა.”
იხილეთ ვიდეო, რომელშიც ბექა გოჩიაშვილი კონცერტის შესახებ საუბრობს:
