6 მაისს მეტროპოლიტენის მუზეუმში გამართულ კოსტიუმირებულ მიღებას სხვადასხვა სფეროს ვარსკვლავები დაესწრნენ. Doja Cat ერთ-ერთი მათგანი იყო, ვის გამოჩენასაც პრესა განსაკუთრებით ელოდა. ამის მიზეზი Doja Cat-ის პაპარაცული ფოტოებია, რომლებიც Met Gala-მდე რამდენიმე დღით ადრე ვარსკვლავს ნიუ-იორკის ქუჩებში გადაუღეს. როგორც მოსალოდნელი იყო, Doja Cat ყველაზე განსხვავებული იმიჯით წარდგა – ის ხალიჩაზე სველი კოსტიუმით გამოჩნდა.
Met Gala-ზე მისვლამდე Doja Cat პრესამ Mark Hotel-დან გამოსვლისას დააფიქსირა. მას ტანზე თეთრი პირსახოცი ჰქონდა შემოხვეული და მაღალქუსლიანი ფეხსაცმელი ეცვა. გამოირჩეოდა Doja Cat-ის მაკიაჟი, რომელიც ცნობილმა ვიზაჟისტმა პატ მაკგრათმა შეასრულა. რაც შეეხება რეპერის კოსტიუმს, ის მოდის სახლმა Vetements-მა შექმნა, რომლის მფლობელი და შემოქმედებითი ხელმძღვანელი წარმოშობით ქართველი გურამ გვასალიაა. Doja Cat სწორედ გურამ გვასალიასთან ერთად მივიდა Met Gala-ზე.
Entertainment Tonight-თან ინტერვიუში Doja Cat-მა თავისი კოსტიუმის შესახებ ისაუბრა. „ვიცი, რომ ადამიანების არჩევანი თემატიკიდან გამომდინარე ყვავილებზე შეჩერდა, მაგრამ ჩემი არჩევანი ყველაზე ხშირად გამოყენებული ყვავილი – ბამბაა,” – აღნიშნა ვარსკვლავმა.
Met Gala კოსტიუმირებული მიღებაა, რომელიც წინ უძღვის მეტროპოლიტენის მუზეუმის განყოფილების, კოსტიუმების ინსტიტუტის ყოველწლიურ თემატურ გამოფენას. წლევანდელი გამოფენის თემაა „მძინარე მზეთუნახავები: მოდის გამოღვიძება”. სწორედ ამ თემატიკის მიხედვით შეირჩა Met Gala-ს წლევანდელი დრესკოდიც და მისი სახელწოდებაა The Garden of Time.
