მოდის სამყაროს მთავარი მოვლენა Met Gala წელს 6 მაისს გაიმართა. ხალიჩაზე ვარსკვლავები სხვადასხვა ცნობილი დიზაინის კოსტიუმებით წარდგნენ. წინა წლების მსგავსად, წელსაც ერთ-ერთი ყველაზე გამორჩეული იმიჯი Cardi B-მ მოირგო. ის ხალიჩაზე მასიური შავი კოსტიუმით წარდგა.
კოსტიუმი იმდენად მასშტაბური იყო, რომ არტისტს რამდენიმე დამხმარე ახლდა. Met Gala-ზე მისვლისას Cardi B-ის კოსტიუმმა მთლიანად დაფარა საზეიმო ხალიჩა. შავ კოსტიუმს რეპერმა სამკაულების მეშვეობით მწვანე ტონალობები შეუხამა.
„ვფიქრობ, რომ Met Gala გრემის დაჯილდოებაზე წასვლას ჰგავს,”- თქვა Cardi B-მ The Hollywood Reporter-თან ინტერვიუში. რეპერმა გაამხილა, რომ ის მზადებისას ნერვიულობდა.
Met Gala კოსტიუმირებული მიღებაა, რომელიც წინ უძღვის მეტროპოლიტენის მუზეუმის განყოფილების, კოსტიუმების ინსტიტუტის ყოველწლიურ თემატურ გამოფენას. წლევანდელი გამოფენის თემაა „მძინარე მზეთუნახავები: მოდის გამოღვიძება”. სწორედ ამ თემატიკის მიხედვით შეირჩა Met Gala-ს წლევანდელი დრესკოდიც და მისი სახელწოდებაა The Garden of Time.
