ანა ჟორდანიას და ნიკო მჭედლიშვილის მიერ შექმნილი ინდი პოპ/ჰიპ-ჰოპ ბენდ ANIK –ის ახალი პროექტი 18 მაისს გამოქვეყნდა. Მიქსთეიფი, რომლის სახელწოდებაცაა 91011, ჯგუფის მე-9 მე-10 და მე-11 სიმღერის რიგობითობის აღმნიშვნელია.
მიქსთეიფში შესული სამივე სიმღერა საერთო კონცეფციის მატარებელია, სადაც ძველი ქართული მუსიკის ელემენტები თანამედროვე ჟღერადობებთან შერწყმით საერთო ჯამში საინტერესო სინთეზს ქმნის.
სიმღერა Dog Days ძველი ქართული ჯაზ-ბენდის, „ჯაზ ქორალის” ერთ-ერთი სიმღერიდან, „მოდის წვიმა” არის აღებული, სადაც მელოდიები ტრეკის ინსტრუმენტულ ნაწილად არის გამოყენებული.
ანა ჟორდანია: „მე, როგორც ჯაზ-ვოკალისტი, ყოველთვის ვცდილობ ჩვენს სიმღერებში ჯაზური ელფერი არ დაიკარგოს, ამ შემთხვევაში ძალიან მიხარია, რომ ქართული ჯაზის ელემენტები მაქვს გამოყენებული, რაც ეროვნულობასაც და თავისთავად „ჯაზურობასაც” სძენს სიმღერას.
ნიკო მჭედლიშვილი: „სიმღერის „მოდის წვიმა” მელოდიები ძალიან უხდება ჰიპ-ჰოპის ნაწილს, უფრო რეტრო, კლასიკური ჰიპ-ჰოპის სტილში ისმინება, რაც ჩემთვის ძალიან საინტერესოა.”
სიმღერა Burden-ის ინსტრუმენტული ნაწილის მოტივი, ძველი ქართული კინოფილმ „მაია წყნეთელიდან” არის აღებული – სიმღერიდან „მათე ბიჭის სიმღერა”.
ანა: „ჩემი აზრით, თანამედროვე მინიმალისტური ბითები და ეს ძალიან ცოცხალი ქართული მელოდია ერთად უცხო და სასიამოვნო მოსასმენი გამოვიდა.”
Რაც შეეხება 91011-ის მესამე სიმღერას „დღე და ღამე”, იგი ერთგვარად ამ მიქსთეიფის ეპილოგია.
ანა: „ის თითქოს დაუმთავრებელი სიმღერაა და ბოლო სიტყვასავით ისმინება. ეს სიმღერა არის თავიდან ბოლომდე ქართული და განსაკუთრებულად ჩვენი ქვეყნის დღევანდელ ემოციურ მდგომარეობას ასახავს.”
91011-ის მუსიკა, კონცეფცია და ფროდაქშენი ანა ჟორდანიას ეკუთვნის, ხოლო ტექსტი, რექორდინგი, მიქსინგი, მასტერინგი და ალბომის ვიზუალური ნაწილი ნიკო მჭედლიშვილის მიერ არის შექმნილი, სადაც არტისტებს სურდათ ევროპის დროშის ფერები და მინიმალიზმი წარმოეჩინათ.
ANIK-ი ზაფხულში მსმენელს კიდევ ერთი ახალი სინგლის გამოცემას ჰპირდება, რაზეც ვიდეო-კლიპის დამზადებასაც აპირებენ, მანამდე კი მოისმინეთ 91011-ში შესული სიმღერები.
