Into the Open ერთგვარი „მულტიმედიური საკონცერტო გამოცდილებაა“, რომელსაც საფუძველი გერმანიაში ჩაეყარა. 2023 წლის იანვარში დამოუკიდებელი მუსიკალური ფესტივალი ბერლინში გაიმართა, რომლის მთავარი თემაც Dreams იყო, წელს კი საფესტივალო დღეები თბილისში, სოხუმის თეატრის სცენაზე შედგა, წლევანდელი ფესტივალის მთავარი თემა კი ხედვა გახლდათ!
სოხუმის სახელმწიფო დრამატულმა თეატრმა ფესტივალს 23-25 მაისის ჩათვლით უმასპინძლა, ამ დღეების განმავლობაში სცენაზე არაერთი მსოფლიო სახელოვნებო სივრცის არტისტი წარდგა.
Into the Open-ის დასკვნით დღეს სცენა ამერიკული ცეკვის თეატრის, „ელვინ ეილის“ ცნობილმა სოლისტმა, ეშლი გრინმა, „შტეგრაიფის“ ორკესტრის ჩელისტმა ტაბეა შრენკმა და თბილისის ჯაზ-ანსამბლმა ლუკა თოფურიას – (ფორტეპიანო), ხატია ქორიძეს – (ბასი), და სოსო ცაგარეიშვილის – (დრამი) შემადგენლობით დაიკავა.
ეშლი გრინი 2021 წლიდან ნიუ-იორკში არსებული ცნობილი ამერიკული ცეკვის თეატრის, „ელვინ ეილის“ სოლისტი გახლავთ, ამავე წელს პრესტიჟულმა ჟურნალმა Dance Magazine იგი იმ 25 არტისტს შორის დაასახელა, რომელთა სცენაზე ხილვაც არის რეკომენდებული.
სოხუმის სახელმწიფო დრამატული თეატრის სცენაზე ფესტივალი Into the Open დასრულდა. ფესტივალის ძირითადი მიზანი, კლასიკური მუსიკის საინტერესო სივრცეში გაცოცხლება, წარმატებით იქნა მიღწეული, სადაც დამსწრე საზოგადოებამ, არაერთი დაუვიწყარი და შთამბეჭდავი პერფორმანსი იხილა.
