ლაშა გაბუნია ჯგუფ „აუტსაიდერის” აქამდე უცნობ ვიდეოს აქვეყნებს

Billboard
30 მაისი, 2024

ჟურნალისტი ლაშა გაბუნია ჯგუფ „აუტსაიდერის” აქამდე უცნობ ვიდეოს აქვეყნებს. ვიდეო 1995 წლის პირველ იანვარს არის გადაღებული და მასში „აუტსაიდერი” პირველად ასრულებს სიმღერას „ნიღბები”.

ვიდეოს ისტორიაზე ბილბორდ საქართველოს თავად ლაშა გაბუნია ესაუბრა:

„ჩვენ გვქონდა ასეთი „ნიღბების კლუბი”, რომელიც ქუთაისში დავაარსეთ არაოფიციალურად 1994 წლის 8 ნოემბერს და ყოველი თვის 8 რიცხვში ქალაქის სხვადასხვა ადგილას ვაკეთებდით აქცია-რეპეტიციებს. ეს „ნიღბების კლუბი” შეიქმნა სწორედ „აუტსაიდერის” ირგვლივ, რომელიც იმ დროს პროდიუსერისა და მენეჯერის გარეშე დარჩა, ამიტომ გადავწყვიტეთ, რომ ჯგუფთან ერთად რაღაც ღონისძიებები გაგვეკეთებინა. ეს არ ეხებოდა მხოლოდ მუსიკას. აქ იყო გამოფენებიც, სხვა კულტურული ღონისძიებებიც. ეს პირველი იანვრის აქცია კი, ასე ვთქვათ, რიგგარეშე იყო, რადგან არ იყო 8 რიცხვი. ახალ წელს შევხვდით ჩვენი კლუბის წევრ კახა კახიძის სახლში, შემდეგ კი გარეთ გამოვედით და სხვადასხვა ქუჩაზე რობი სიმღერებს მღეროდა. მაგალითად, პირდაპირ ქუთაისის მერიის კაბინეტთან იმღერა „მაფია მშია” და პოლიციელები გამოვიდნენ. მერე უკვე სხვა უბანში ერთმა პოლიციელმა მეგაფონიც კი გვათხოვა, რომ გვემღერა. ბოლოს კი წავედით „აუტსაიდერის” ყოფილი მენეჯერისა და ნათლიის, ვახტანგ ნებიერიძის, იგივე სტრადივარის სახლში და სწორედ იქ არის ჩაწერილი ეს სიმღერაც.

ეს იყო პირველი რეპეტიცია 1995 წელს და, როგორც მახსოვს, „ნიღბებიც” პირველად ზუსტად მანდ შესრულდა – რობი ტექსტშიც იყურებოდა. იქ ნარდზე ვინც უკრავს, ის არის მაშინ ახლადაყვანილი დრამერი გია შილაკაძე, ბასგიტარაზე კი – საბა კუპრაშვილი. მე იმ დროს ტელევიზიაში ვმუშაობდი და რაც შემეძლო, ყველაფერს ვიღებდი ჩემს ოპერატორებთან ერთად. ასე რომ, ეს ვიდეოკასეტა მე მაქვს და ეს მასალაც პირველად გამოქვეყნდა. ამავე დღის მეორე ვიდეოც დავდე, რომელიც უკვე კახა კახიძის სახლში არის გადაღებული.

ეს მთელი ღამის ბოდიალი კი დავასრულეთ მერაბ ბერძენიშვილის დიდების მემორიალი რომ იყო, მემორიალთან კი არა, მემორიალში. ამის ვიდეომასალაც მიდევს. ძალიან მაღალი ძეგლი იყო ძალიან გრძელი კიბეებით, იქ ავედით ბოლომდე და ასე დავასრულეთ დღე.”