ბილი აილიშმა 5 ივნისს ახალი სიმღერის, Chihiro-ს მუსიკალური კლიპის ანონსი გამოაქვეყნა და გულშემატკივარს გაუმხილა, რომ ვიდეო 6 ივნისს გამოვა.
სიმღერა სახელწოდებით Chihiro სტუდია გიბლის ანიმაციური ფილმის, Spirited Away-ს შთაგონებით არის შექმნილი, სადაც მთავარ გმირს სწორედ ეს სახელი ჰქვია. აღსანიშნავია, რომ ბილი აილიში ჰაიაო მაიძაკის ანიმაციების დიდი ხნის თაყვანისმცემელია და ერთ-ერთი ინტერვიუს დროს ხუმრობითაც თქვა, რომ Spirited Away-ს პერსონაჟ დრაკონზე იყო შეყვარებული.
ალბომის პროდიუსერი, ტრადიციისამებრ, პოპ-მუსიკოსის ძმა, ფინიასია. Hit Me Hard and Soft ბილი აილიშის მესამე სტუდიური ალბომია, რომელიც 10 ტრეკს მოიცავს. არტისტმა სადებიუტო LP – When We All Fall Asleep, Where Do We Go? – 2019 წელს გამოსცა, 2021 წელს კი მეორე ალბომი – Happier Than Ever წარადგინა. ორივე ნამუშევარი Billboard 200-ის ჩარტის ლიდერი გახდა და პირველ ადგილს კვირაზე მეტხანს იკავებდა. ახალი ალბომის გამოსვლამდე ბილი აილიშს ცალკეული სინგლები არ გაუვრცელებია. როგორც 22 წლის მომღერალმა თავის გულშემატკივრებს აუწყა, მას სურდა, ყველა ნამუშევარი ერთდროულად მიეტანა მსმენელამდე.
აღსანიშნავია, რომ 1 ივნისის მონაცემებით ბილბორდ 200-ში ალბომი Hit Me Hard and Soft მეორე ადგილზეა.
