მუსიკოსი და დიზაინერი ფარელ უილიამსი Despicable Me-ის შემოქმედებით გუნდთან გაერთიანდა. 14 ივნისს მუსიკოსმა ახალი ტრეკი გამოუშვა, რომელიც ცნობილი ანიმაციის მეოთხე ნაწილის საუნდტრეკია. Double Life – ასე ჰქვია სიმღერას, რომელიც Despicable Me 4-ში გაჟღერდება.
ანიმაციური ფილმის რეჟისორი კრის რენოა. Despicable Me 4-ს მაყურებელი კინოთეატრების ეკრანებზე სამ ივლისს იხილავს. სიუჟეტი კვლავაც მთავარი გმირის, გრუს ირგვლივ განვითარდება. ახალ ნაწილში ის თავის მტერს, ანიმაციის მთავარ ანტაგონისტს, მაქსიმ ლე მალს დაუპირისპირდება.
ფარელ უილიამსის მუსიკალურ კარიერაში ყველაზე დიდი ჰიტი სწორედ Despicable Me-ს უკავშირდება. ტრეკი სახელწოდებით Happy, რომელიც 2014 წელს გამოვიდა, ანიმაციის მეორე ნაწილის საუნდტრეკი იყო. სიმღერა Billboard Hot 100-ის მუსიკალურ ჩარტში პირველ ადგილს იკავებდა. მუსიკალური ნამუშევრისთვის საუკეთესო პოპ სოლო შესრულების კატეგორიაში ფარელ უილიამსმა გრემიც მიიღო და ოსკარზე იყო ნომინირებული.
მოუსმინეთ ფარელ უილიამსის ახალ სიმღერას Double Life:
