მსოფლიო მუსიკალური სცენის ვარსკვლავი M.I.A Tbilisi Open Air 2024-ის სცენაზე – მეორე საფესტივალო დღის მიმოხილვა

მუსიკოსის შესრულება აუდიტორიასთან ხშირი ინტერაქციით გამოირჩეოდა, თუმცა არტისტმა ისეთი გზავნილებიც გააჟღერა, რომლებიც მსმენელის დიდი ნაწილისათვის დამაბნეველი აღმოჩნდა და შემდგომ სოციალურ ქსელში აქტიური განხილვა მოჰყვა.

22 ივნისს Tbilisi Open Air-ის მეორე საფესტივალო დღე გაიმართა. აუდიტორიის წინაშე ქართველი მონაწილეები და ერთი საერთაშორისო ჰედლაინერი – M.I.A წარდგა. 

მსმენელმა ფესტივალის მთავარ სცენაზე მოისმინა ისეთი შემსრულებლები, როგორებიც არიან: Circus Mircus, Killages, Avara, ბაჩო ჯიქიძე & ესთეტი ბიჭები. ქართველი შემსრულებლების მუსიკალური ნომრები აუდიტორიის ჩართულობით და არტისტებსა და მსმენელს შორის ინტერაქციით მიმდინარეობდა. 

ქართული ბენდებისგან პერფორმანსისას მოვისმინეთ განცხადებები, რომლებიც საქართველოში მიმდინარე პროცესებს შეეხებოდა, ასევე გაჟღერდა რუსეთის მიმართ ღია საპროტესტო განაცხადებიც. 

Billboard Georgia  ფესტივალის მეორე დღის მსვლელობისას Avara-ს გაესაუბრა, რომელიც Tbilisi Open Air-ის მთავარ სცენაზე პირველად გამოვიდა. 

ნიკა ჩოხელი, Avara-ს ფრონტმენი:

„Avara-სთვის მთავარ სცენაზე პირველი გამოსვლა იყო და ეს გამოცდილება, ალბათ, მთელი ცხოვრება გაგვყვება. ეს არის ის სცენა, რომლიდანაც საშუალება გაქვს, ამდენ მსმენელს შენი სიმღერა უკეთ გააცნო. პირველად Tbilisi Open Air-ს 2009 წელს დავესწარი, მაშინ პირველად ჩატარდა ეს ფესტივალი. მაშინ 14 წლის ვიყავი. მას შემდეგ ყოველ წელს მოვდივარ. რაც შეეხება საერთაშორისო მონაწილეებს, ერთ-ერთი არტისტი, რომელსაც წელს განსაკუთრებით ველოდებოდი არის AURORA. ის ყველაზე ახალბედა არტისტია, ვინც Tbilisi Open Air-ის ჰედლაინერებს შორის ყოფილა. აღსანიშნავია ისიც, რომ ის ახლა განსაკუთრებული ყურადღების ცენტრშია და ეს გარემოებაც კარგად დაემთხვა.”

M.I.A. ფოტო: ნინუცა კაკაბაძე

ქართველი შემსრულებლების შემდეგ სცენა მეორე საფესტივალო დღის მთავარ მონაწილეს და Tbilisi Open Air 2024-ის წამყვან ჰედლაინდერს – M.I.A.-ს დაეთმო. არტისტი სცენაზე მოცეკვავეებთან ერთად გამოვიდა. ჩვეული სასცენო იმიჯით, ქორეოგრაფიული ელემენტებითა და შესრულების დამახასიათებელი მანერით, მუსიკოსი იმ ენერგეტიკით ხასიათდებოდა, რამაც საფესტივალო ტერიტორიაზე გამორჩეული ატმოსფერო შექმნა.

M.I.A.-მ თავისი გამოსვლა გახსნა ტრეკით, სახელწოდებით, Double Bubble Trouble რომელიც შესულია არტისტის ცნობილ ალბომში – Matangi. ლაივის დროს ასევე შესრულდა ისეთი ჰიტები, როგორებიც არის: Bad Girls, Paper Planes, Borders.  მუსიკოსის შესრულება აუდიტორიასთან ხშირი ინტერაქციით გამოირჩეოდა, თუმცა არტისტმა ისეთი გზავნილებიც გააჟღერა, რომელიც მსმენელის დიდი ნაწილისათვის დამაბნეველი აღმოჩნდა და შემდგომ სოციალურ ქსელში აქტიური განხილვა მოჰყვა. 

M.I.A.-მ აღნიშნა, რომ ეს საქართველოში მისი პირველი ჩამოსვლაა. არტისტმა ასევე ახსენა საქართველოს ნაკრების  მონაწილეობა ევროპის საფეხბურთო ჩემპიონატზე. 

M.I.A. ფოტო: ნინუცა კაკაბაძე

აუდიტორიის დაბნეულობა და სხვადასხვაგვარი რეაქციები გამოიწვია ფაქტმა, როცა M.I.A.-მ საქართველო და რუსეთი ერთ წინადადებაში ახსენა – „საქართველო, რუსეთი” – დაიძახა არტისტმა ტრეკის შესრულების წინ, რასაც  სხვადასხვა შეფასება და კონტექსტის განსხვავებული აღქმა მოჰყვა. მსმენელის ნაწილი აღნიშნავს, რომ M.I.A. აუდიტორიისგან ორივე ქვეყნის ხსენების შემდეგ შესაბამისი რეაქციის გაჟღერებას ელოდა, რაც საქართველოს შემთხვევაში მხარდამხარ შეძახილები უნდა ყოფილიყო, რუსეთის შემთხვევაში კი – პროტესტი. 
მსმენელის ნაწილი კი ამ რეპლიკამ გაანაწყენა და გაიჟღერა მოსაზრებამ, რომ არტისტის მხრიდან რუსეთის საქართველოსთან ერთად ხსენება არაეთიკური და კონტექსტისათვის შეუსაბამო იყო. 

M.I.A.-ს შესრულებისას კიდევ ერთი დასამახსოვრებელი მომენტი მსმენელის მიერ გაჟღერებული პოზიცია იყო. როდესაც მუსიკოსმა აუდიტორიიდან ერთ-ერთ გულშემატკივარს  მიკროფონი მიაწოდა, მან რუსეთისადმი მწვავე პროტესტი გამოხატა. მოგვიანებით ამავე მსმენელს არტისტმა მიმართა, რომ თუ რუსეთს ამგვარი სიტყვებით მოიხსენიებს, მეტად ძლიერი უნდა იყოს. ეს უკანასკნელი ფრაზა არტისტის მხრიდან კიდევ ერთი ის განაცხადი იყო, რომელმაც მსმენელის ნაწილის დაბნეულობა გამოიწვია. 

M.I.A. ფოტო: ნინუცა კაკაბაძე

ლაივის ერთ-ერთი მნიშვნელოვანი მომენტი იყო, როცა M.I.A. ყველასათვის მოულოდნელად სცენიდან ჩამოვიდა და აუდიტორიისაგან გამყოფ ჯებირზე ავიდა. ლაივის დროს ის ხშირად ართმევდა ფანებს მობილურ მოწყობილობებს და ვიდეოებს წერდა. 

მსმენელისათვის ემოციური მომენტი აღმოჩნდა, როცა არტისტს აუდიტორიიდან საქართველოს დროშა მიაწოდეს. „აქ საქართველოს დროშა მაქვს. მასზე ჯვრებია გამოსახული. ჯვარს ჩემთვის დიდი სიმბოლური დატვირთვა აქვს,” – თქვა მუსიკოსმა. მან დროშა სასცენო კოსტიუმზე დაიმაგრა და სწორედ ასე შეასრულა მომდევნო სიმღერა. 

Tbilisi Open Air-ის მეორე დღე სწორედ M.I.A.-ს შესრულებით დასრულდა. ფესტივალის მე-15 საიუბილეო სეზონი 23 ივნისს დაიხურება და Tbilisi Open Air მსმენელს 2025 წლამდე დაემშვიდობება. 

Share
Tweet
Share
Share
Share

წინა სტატია

ბილი აილიში აბაზანაში გადაღებულ ვიდეოს აქვეყნებს, რომელშიც ფრენკ ოუშენის Solo-ს მღერის

შემდეგი სტატია

პოლ მაკარტნიმ ლონდონში ტეილორ სვიფტის გულშემატკივრებთან ერთად ტეილორის სიმღერაზე – But Daddy I Love Him იცეკვა

შეიძლება დაგაინტერესოთ

კამალა ჰარისი კამპანიის ფარგლებში თავისი გუნდის წინაშე ბიონსეს Freedom-ის ფონზე წარდგა

ჰარისმა გუნდს მას შემდეგ მიმართა, რაც ჯო ბაიდენმა 2024 წლის საპრეზიდენტო არჩევნებში დემოკრატების კანდიდატად მხარი მას დაუჭირა.
მეტი

მუსიკოსები და სხვა ცნობილი ადამიანები ჯო ბაიდენის მიერ საპრეზიდენტო არჩევნებში კანდიდატურის მოხსნას ეხმიანებიან

„ჯო ბაიდენი ისტორიაში შევა, როგორც ადამიანი, რომელმაც თავისი საპრეზიდენტო ვადის ბოლო ეტაპზეც მნიშვნელოვან წარმატებას მიაღწია,” - განაცხადა ბაიდენის მხარდამჭერმა ბარბრა სტრეიზანდმა.
მეტი