ბრიტანულმა ჯგუფმა Coldplay-მ სიმღერა სახელწოდებით Good Feelings, რომელიც ჯერ არ გამოქვეყნებულა, რომის ოლიმპიურ სტადიონზე მიმდინარე კონცერტის დროს შეასრულა.
ჯგუფის გულშემატკივრებმა ამ სიმღერის შესახებ საკმაოდ დიდი ხანია იციან. გამოცემა Rolling Stone-ის თანახმად მაქს მარტინის პროდიუსერობით შექმნილი სიმღერა 2021 წლის ალბომ Music of the Spheres-სთვის იყო შექმნილი, თუმცა ის სავარაუდოდ Coldplay-ის მეათე ალბომ Moon Music-ში შევა.
ივნისში Coldplay-მ მაქს მარტინის პროდიუსერობით შექმნილი სინგლი Feelslikeimfallinginlove გააზიარა, რომელიც ასევე ალბომ Moon Music-ში შევა.
ახალი ალბომის გამოცემა 4 ოქტომბერს არის დაგეგმილი. 2023 წლის იანვარში კრის მარტინმა Toronto City News-სთან საუბრისას თქვა, რომ ბენდი Music of the Spheres-ის სერიაში მეორე LP-ის გამოსცემს. „ეს მალე არ იქნება, თუმცა მომავალ წელს რამდენიმე ახალი სინგლი გამოვა.“ – აღნიშნა იმ დროს ჯგუფის ფრონტმენმა.
Coldplay-ის გლობალური ტური 2022 წლის 18 მარტს კოსტა-რიკაში დაიწყო. წლევანდელი ტურის ბოლო ორი კონცერტი კი 15-16 ნოემბერს ახალი ზელანდიის ქალაქ ოკლენდში, ედენ პარკშია დაგეგმილი.
ნახეთ Coldplay-ის სიმღერის Good Feelings დებიუტი ქალაქ რომში.
