მადონამ ინსტაგრამზე ახალი პოსტი გამოაქვეყნა, რომელიც აჩენს ვარაუდს, რომ მის ბიოგრაფიულ ფილმზე მუშაობა იწყება. ფოტო კოლაჟში ის საბეჭდ მანქანასთან ერთად არის გადაღებული და სცენარის წერის პროცესშია. ფოტოებში ვხედავთ სცენარის სათაურსაც – Who’s That Girl, რომელიც მომღერლის 1987 წლის ფილმისა და სიმღერის სახელწოდებაა. მიუხედავად ამ მინიშნებებისა, მადონას ჯერჯერობით ოფიციალურად არ დაუდასტურებია, რომ ბიოგრაფიულ ფილმზე მუშაობა იწყება.
2023 წლის იანვარში გავრცელდა ინფორმაცია, რომ ბიოგრაფიულ სურათზე მუშაობა Universal Pictures-მა დროებით შეაჩერა, რათა მომღერალი გლობალურ საკონცერტო ტურნეზე, Celebration Tour-ზე ფოკუსირებულიყო. მადონას ბიოგრაფიული ფილმი პირველად 2020 წელს დაანონსდა. თავდაპირველი ინფორმაციით ნამუშევარი მომღერლის ცხოვრებასა და კარიერაზე მოუყვებოდა მაყურებელს. მოგვიანებით გავრცელდა ხმები, რომ მთავარ როლს სერიალ Inventing Anna-ს ვარსკვლავი ჯულია გარნერი შეასრულებდა. იმავე პერიოდში მედია იუწყებოდა, რომ ჯულია გარნერმა როლისათვის მზადება დაიწყო, რაც მადონას ქორეოგრაფებთან და ვოკალის მასწავლებლებთან მომზადებასაც გულისხმობდა. პრესა ასახელებდა სხვა მსახიობებსაც, რომლებმაც როლისათვის კასტინგი გაიარეს. მათ შორის იყვნენ: ფლორენს პიუ, ოდესა იანგი და ალექსა დემი.
„მიზეზი, რატომაც ამას თავად ვაკეთებ, არის ის, რომ უამრავმა ადამიანმა სცადა ჩემს შესახებ ფილმის გადაღება, თუმცა ისინი ყველანი კაცები იყვნენ,” – აღნიშნა მადონამ გასულ წელს ჯიმი ფელონის შოუში სტუმრობისას.
