ჯესი ჯეიმ ფანებს გაუმხილა, რომ სამი თვის წინ მას ობსესიურ-კომპულსიური აშლილობისა (OCD) და ყურადღების დეფიციტისა და ჰიპერაქტივობის სინდრომის (ADHD) დიაგნოზი დაუსვეს. მომღერლის თქმით, ეს ინფორმაცია მას ბავშვობისა და მოზარდობისას არსებული პრობლემების გააზრებაში დაეხმარა.
სოციალურ ქსელში დაწერილ ვრცელ პოსტში 36 წლის ვარსკვლავი ხსნის, თუ როგორ იმოქმედა დიაგნოზის გაგებამ საკუთარი თავისადმი დამოკიდებულებაზე.
„3 თვის წინ დამისვეს ADHD-სა და OCD-ის დიაგნოზი. რეაქცია, რომელიც მქონდა, იყო: „კი, ჩვენ ეს ვიცოდით” და, რა თქმა უნდა, რაღაც დონემდე ვიცოდი, მაგრამ ბავშვის გაჩენამ ის კიდევ უფრო ცხადი გახადა. ეს კი, რაღაც მხრივ, დამამშვიდებელი აღმოჩნდა, რადგან ჩემთვის ნაკლებად მძიმე და საშიში გახდა. გარკვეული პერიოდი ვფიქრობდი, რომ ამის შესახებ ვერ ვისაუბრებდი. თუმცა, აი, აქ ვარ და ამაზე ვსაუბრობ,” – წერს მომღერალი.
„უცნაურია, როცა იცი, რომ მთელი ცხოვრებაა, თავს ცოტა განსხვავებულად გრძნობ და მოვლენებს განსხვავებულად აღიქვამ. ერთ დღესაც კი, როცა ამას ყველაზე ნაკლებად ელი, ვიღაც გიხსნის, თუ რატომ ხდება ეს და რომ ამის თავიდან მოშორება არ შეგიძლია. გულწრფელად რომ ვთქვა, ახლა ვფიქრობ, რომ ეს სუპერძალაა, როცა მას სწორი პერსპექტივიდან შეხედავ და სწორ მხარდაჭერას მიიღებ შენ ირგვლივ მყოფი ადამიანებისგან.”
2020 წლის მონაცემებით, ADHD მსოფლიოს მასშტაბით 366 მილიონზე მეტ ზრდასრულს, ხოლო OCD-ის დიაგნოზი მსოფლიო მოსახლეობის 1-3% აქვს დასმული. „მე ვცდილობ, რომ ხელი ჩაგკიდოთ, რადგან თავად მეც მჭირდება ხელის ჩაკიდება. მე არ მაქვს საზღვრები. ამ დიაგნოზმა ჩემი თავი უფრო შემაყვარა. ახლა მე ჩემს 11 წლის თავს ვეხუტები, რომელიც სპორტულ ფეხსაცმელს კბილის ჯაგრისით წმენდდა, როცა დასტრესილი იყო და დღემდე 1000 სიით ცხოვრობს, იმ გრძნობისგან თავის დასაღწევად, რომ ცხოვრება ჩამოეშლება.”
მომღერალმა პოსტი ამაღლებულ განწყობაზე დაასრულა: „არაფერია ცხოვრებაში, რაც ჩვენ განგვსაზღვრავს, მაგრამ ეს ყველაფერი გვეხმარება, რომ გავიზარდოთ და ჩვენი თავის უფრო სრულყოფილი ვერსია გავხდეთ.”
ნახეთ ჯესი ჯეის პოსტი:
