ტეილორ სვიფტის ვენაში დაგეგმილი კონცერტები მას შემდეგ გაუქმდა, რაც პოლიციამ ორი ეჭვმიტანილი დააკავა, რომლებიც, არსებული ინფორმაციით, შოუებზე ტერორისტულ თავდასხმას გეგმავდნენ.
ახალი ამბავი Barracuda Music-მა გაავრცელა, რომელიც სვიფტის ავსტრიული კონცერტების პრომოუტერია. „მოსალოდნელ ტერორისტულ აქტებზე სამთავრობო უწყებებიდან ინფორმაციის მიღების შემდეგ ჩვენ სხვა არჩევანი არ გვქონდა, გარდა იმისა, რომ სამივე კონცერტი გაგვეუქმებინა. ყველა ბილეთი ავტომატურად დაბრუნდება 10 სამუშაო დღის ვადაში.”
ეს განცხადება მოჰყვა პოლიციის მიერ გავრცელებულ ინფორმაციას, რომ ოთხშაბათს დილით ავსტრიის 19 წლის მოქალაქე დააკავეს ტერორისტული აქტის დაგეგმვისთვის ვენაში, რომლის სამიზნე, სავარაუდოდ, სვიფტის კონცერტი უნდა ყოფილიყო. ABC News-ის ცნობით, იმავე დღეს დააკავეს მეორე ეჭვმიტანილიც.
მედიასაშუალების თანახმად, შინაგან საქმეთა სამინისტროს პრესკონფერენციაზე განაცხადეს, რომ ეჭვმიტანილები თავდასხმას ინტერნეტით ამზადებდნენ, 19 წლის ავსტრიელი კი ივლისში ისლამური სახელმწიფოს ლიდერის მოკავშირე გახდა. შოუების გაუქმებამდე შინაგან საქმეთა სამინისტროში განაცხადეს, რომ კონცერტებზე გაიზრდებოდა უსაფრთხოების ზომები.
ტეილორ სვიფტის კონცერტები ვენაში ევროპული მარშრუტის ბოლოსწინა შოუები უნდა ყოფილიყო, რომელსაც ლონდონის უემბლის სტადიონის ხუთი კონცერტი უნდა მოჰყოლოდა. ოქტომბერში კი სვიფტი უკვე ჩრდილოეთ ამერიკაში ბრუნდება ბოლო საკონცერტო წრეზე აშშ-სა და კანადაში, რითიც გრანდიოზული Eras Tour საბოლოოდ სრულდება.
ნახეთ Barracuda Music-ის განცხადება:
