მსოფლიოს ორი დიდი ვარსკვლავი გაერთიანდა – ლედი გაგამ და ბრუნო მარსმა ერთობლივი სიმღერა Die With a Smile და მასზე გადაღებული ვიდეოკლიპი გამოაქვეყნეს.
ახალი პროექტის შესახებ წყვილს ფანები წინასწარ არ გაუფრთხილებია. მათ თანამშრომლობა დუეტის გამოსვლამდე 12 საათით ადრე დაადასტურეს. გაგამ სოციალური ქსელით სიმღერის ქავერი გამოაქვეყნა, სადაც მუსიკოსები ლურჯ-წითელი რეტრო სამოსით პოზირებენ. „სანამ LG7-ს ელოდებით… DIE WITH A SMILE – დუეტი ბრუნო მარსთან,” – დაწერა მომღერალმა.
2 დღით ადრე კი ლედი გაგამ ფანებს პატარა მინიშნებაც მისცა. მან მოკლე ვიდეო გაავრცელა, სადაც ფორტეპიანოზე ბრუნო მარსის გამოსახულებიანი მაისურით უკრავს.
საკმაოდ დიდი ხანია, რაც არც ერთ მუსიკოსს ახალი სოლო ნამუშევარი არ გამოუცია. გაგას ბოლო ალბომი Chromatica 2020 წელს გამოვიდა, მარსის 24K Magic-ს კი უკვე 8 წელი უსრულდება.
თუმცა, ფანების სასიხარულოდ, ლედი გაგა მალე ახალ ალბომს გამოსცემს, რაც სოციალური ქსელის საშუალებით არაერთხელ დააანონსა. მან პარიზში შეკრებილ ფანებს ალბომის ორი სიმღერიდან მცირე მონაკვეთებიც მოასმენინა.
მოუსმინეთ ლედი გაგას და ბრუნო მარსის ახალ სიმღერას Die With a Smile:
