კამალა ჰარისი მუსიკის დიდი მოყვარულია. აშშ-ს დემოკრატიული პარტიის პრეზიდენტობის კანდიდატმა მუსიკალურ შოუ Track Star-ში მიიღო მონაწილეობა, სადაც სიმღერები რამდენიმე ნოტით უნდა გამოეცნო. კამალა ჰარისმა ადვილად ამოიცნო სტივი უანდერის სიმღერა, რომელსაც მან ერთ-ერთი უდიდესი მუსიკოსი უწოდა. „იგი ჩვენი დროის უდიდესი მუსიკოსია. ის არის ლირიკოსი და პოეტი. მისი ღვაწლი კი სოციალური სამართლიანობის საკითხებზე დიდია,“ – ამბობს ჰარისი.
კამალა ჰარისის თქმით, მას მელომანი მშობელი ჰყავდა და მუსიკა მისი ბავშვობის დიდი ნაწილი იყო. თუმცა ისიც აღიარა, რომ მოახლოებულ საპრეზიდენტო არჩევნებთან დაკავშირებით, გადატვირთული გრაფიკის გამო, ბოლო დროს მუსიკას ხშირად ვეღარ უსმენს.
შოუს დასასრულს ჰარისმა აღნიშნა, რომ სიმღერა, რომელიც, მისი აზრით, ყველამ უნდა იცოდეს, არის როი აიერსის 1976 წლის ჰიტი Everybody Loves the Sunshine. „ეს ჩემი ერთ-ერთი საყვარელი კომპოზიციაა,” – თქვა პრეზიდენტობის კანდიდატმა.
@trackstarshow The Vice President of the United States on Track Star @Kamala HQ ♬ original sound – Track Star
ცოტა ხნის წინ კამალა ჰარისმა, დემოკრატიული პარტიის ვიცე-პრეზიდენტობის კანდიდატ ტიმ უოლზთან ერთად, მუსიკაზე ვრცლად ისაუბრა. კანდიდატებმა ყურადღება გაამახვილეს იმაზე, თუ რა გავლენა მოახდინა მუსიკამ მათ ცხოვრებაში. ტიმ უოლზის თქმით, მისთვის მუსიკა ბრიუს სპრინგსტინის 1980-იანი წლის ალბომ The River-ით დაიწყო, რომელიც მისთვის „ტრანსფორმაციული მუსიკა” აღმოჩნდა. ტიმ უოლზმა ასევე ახსენა ბობ სეგერის სიმღერა Night Moves, რომელსაც ცხოვრების საუნდტრეკი უწოდა.
კამალა ჰარისის თქმით კი, მისი მშობლები ხშირად უსმენდნენ ისეთ მუსიკოსებს როგორებიც არიან არეტა ფრანკლინი, სტივი უანდერი, მაილს დევისი და ჯონ კოლტრეინი. მისი ფავორიტი არტისტი კი ყოველთვის იყო Prince. „მე და ჩემს მეუღლეს განსხვავებული მუსიკალური გემოვნება გვაქვს. მე უფრო ჰიპ-ჰოპის მოყვარული ვარ, ის კი Depeche Mode-ს უსმენს. თუმცა ორივეს გვიყვარს Prince. ის საოცარი გიტარისტი იყო და მისი თითქმის ყველა სიმღერა ზეპირად ვიცი,“ – აღნიშნა კამალა ჰარისმა.
