მერაია კერის დედა პატრიცია და და ელისონი გარდაიცვალნენ. როგორც „ბილბორდი” ადასტურებს, მომღერალმა ოჯახის წევრები ერთსა და იმავე დღეს, რამდენიმე საათის დაშორებით დაკარგა.
„გული მაქვს მოკლული, რადგან წინა კვირას დედა დავკარგე. სამწუხაროდ, ამავე დღეს ჩემი დაც გარდაიცვალა. ბედნიერი ვარ, რომ გარდაცვალებამდე ბოლო კვირა დედასთან ერთად გავატარე. ვაფასებ ყველას სიყვარულსა და მხარდაჭერას და ჩემი პირადი სივრცის პატივისცემას ამ მძიმე პერიოდში,” – წერს მომღერალი განცხადებაში.
სხვა დეტალები კერის ოჯახის წევრების გარდაცვალების შესახებ ამ დრომდე უცნობია.
პატრიცია კერი ყოფილი ოპერის მომღერალი და ვოკალის მასწავლებელი იყო. ის დაქორწინებული იყო ალფრედ როი კერიზე, რომელთანაც სამი შვილი ჰყავდა: ელისონი, მერაია და მორგანი. წყვილი ერთმანეთს მაშინ დაშორდა, როცა მერაია 3 წლის იყო. ალფრედი 2002 წელს გარდაიცვალა.
მერაია კერის, რომელიც თავად ორი შვილის დედაა, არაერთხელ უსაუბრია ოჯახის წევრებთან დაძაბულ ურთიერთობაზე. „ჩვენი ურთიერთობა ეკლიანი თოკია სიამაყის, ტკივილის, სირცხვილის, მადლიერების, ეჭვიანობის, აღიარებისა და იმედგაცრუებისა,” – წერს მომღერალი თავის მემუარებში The Meaning of Mariah Carey.
