გიორგი გიგაშვილი 2024 წლის ბეთჰოვენის ფესტივალის რეზიდენტი არტისტია. ფესტივალი 5 სექტემბერს გერმანიის ისტორიულ ქალაქ ბონში გაიხსნა. მუსიკოსი რეზიდენტი არტისტის სტატუსით მსმენელის წინაშე არაერთ საღამოზე წარდგება. ბეთჰოვენის ფესტივალის ფარგლებში გაიმართება გიორგი გიგაშვილის და ნინი ნუცუბიძის ერთობლივი კონცერტი, რომელზეც ქართული სიმღერები შესრულდება. ახლახან სოციალურ ქსელში სწორედ ამ კონცერტის რეპეტიციის კადრები გავრცელდა. მუსიკოსები ასრულებენ სიმღერას „მხოლოდ შენ ერთს”. ვიდეოს ბეთჰოვენის ფესტივალი ინსტაგრამზე აქვეყნებს.
ნინი ნუცუბიძე არ არის ერთადერთი ქართველი არტისტი, რომელთან ერთადაც გიორგი გიგაშვილი მსმენელის წინაშე წარდგება. ფესტივალის რეზიდენტი არტისტის სტატუსით გიორგი გიგაშვილი წარადგენს კონცერტს, რომელზეც მისი და Nikala-ს (ნიკალა ზუბიაშვილის) ერთობლივი მუსიკალური პროექტი „სერიოზული მუსიკა” გაჟღერდება. „სერიოზული მუსიკა” აკადემიური და ელექტრონული მუსიკის სინთეზია, სადაც კლასიკა თანამედროვეობას ხვდება.
