10 სექტემბერს შეერთებული შტატების საპრეზიდენტო კანდიდატების, დონალდ ტრამპისა და კამალა ჰარისის დებატები გაიმართა. დებატებს ვრცელი პოსტით ტეილორ სვიფტი გამოეხმაურა. ვარსკვლავმა სოციალურ ქსელში 300-სიტყვიანი მიმართვა გააზიარა.
ამ პოსტით სვიფტმა დემოკრატების კანდიდატს, კამალა ჰარისს მხარდაჭერა საჯაროდ გამოუცხადა. ვარსკვლავმა საზოგადოებას მოუწოდა, არჩევნებამდე კვლევა ჩაატარონ, რათა თითოეული კანდიდატის პოლიტიკური გეგმების შესახებ მეტი შეიტყონ.
„2024 წლის საპრეზიდენტო არჩევნებზე ხმას ამალა ჰარისს და ტიმ უოლცს მივცემ,” – წერს სვიფტი სოციალურ ქსელში. „კამალას ხმას ვაძლევ, რადგან ის ადამიანის უფლებებისათვის იბრძვის,” – განმარტავს არტისტი. ტეილორ სვიფტმა კამალა ჰარისი წარმატებულ ლიდერად მოიხსენია და აღნიშნა, რომ შეერთებული შტატების კეთილდღეობისათვის საჭიროა სიმშვიდე და არა ქაოსი.
სვიფტმა თავის პოსტში საგანგებოდ აღნიშნა კამალა ჰარისის ვიცე პრეზიდენტობის კანდიდატი, ტიმ უოლცი, რომელიც წლების განმავლობაში LGBTQ თემის და ქალების უფლებების, მათ შორის რეპროდუქციული უფლებებისათვის იბრძვის.
სვიფტი თავის პოსტში დონალდ ტრამპის ვებ გვერდზე მისი სახელით განთავსებულ ცრუ მხარდამჭერ განცხადებასაც შეეხო და მას დეზინფორმაცია უწოდა. „ცოტა ხნის წინ შევიტყვე, რომ ხელოვნური ინტელექტის გამოყენებით ჩემი სახელით გაკეთებული მხარდამჭერი ყალბი განცხადება ტრამპის ვებ გვერდზე განთავსდა. ამან ხელოვნური ინტელექტისადმი შიში ნამდვილად გამიჩინა. მოვედი დასკვნამდე, რომ ამ არჩევნებთან დაკავშირებით ჩემი გეგმები გამჭვირვალე უნდა იყოს. დეზინფორმაციასთან ბრძოლის ყველაზე მარტივი გზა სიმართლეა,” – განმარტა ტეილორ სვიფტმა.
პოსტს სვიფტმა თავის კატასთან ერთად გადაღებული ფოტო დაურთო. სვიფტმა ღია წერილის ბოლოს საკუთარ თავს „კატების პატრონი უშვილო ქალი” უწოდა. ამ ტერმინით დონალდ ტრამპის ვიცე პრეზიდენტობის კანდიდატმა, ჯეი დი ვენსმა მოიხსენია.
ტეილორ სვიფტის განცხადებას მოჰყვა როგორც ტრამპის, ასევე მისი ერთგული მხარდამჭერის, ილონ მასკის გამოხმაურება. „კარგი ტეილორ … შენ გაიმარჯვე … მე გაჩუქებ შვილს და დავიცავ შენს კატებს მთელი ჩემი ცხოვრება,” – დაწერა მასკმა სოციალურ ქსელ X-ზე.
Fine Taylor … you win … I will give you a child and guard your cats with my life
— Elon Musk (@elonmusk) September 11, 2024
ეს განცხადება საკმაოდ საკამათოა იმის გათვალისწინებით, რომ სვიფტი მასკზე 20 წლით უმცროსია და ამავდროულად NFL-ის სპორტსმენ, ტრევის კელსის ხვდება. მასკი, რომელსაც უკვე მრავალი წელია, მარსზე ადამიანების დასახლების ამბიცია აქვს, 12 აღიარებული შვილის მამაა. სამი შვილი მასკს ყოფილი მეგობარი ქალის, მუსიკოს Grimes-ისგან ჰყავს. ამჟამად ბიზნესმენს მუსიკოსთან მეურვეობის თაობაზე სასამართლოში დავა აქვს.
მასკი სოცილურ ქსელში ასევე გამოეხმაურა ტრამპის განცხადებას, რომელმაც თქვა, რომ ჰაიტელი მიგრანტები ოჰაიოში ადგილობრივი მაცხოვრებლების „კატებს და ძაღლებს ჭამდნენ”. ილონ მასკმა ამ განცხადების შემდეგ სერიალ „სიმპსონებიდან” ერთ-ერთი სცენის ამსახველი სურათი გამოაქვეყნა.
პოლიტიკური ექსპერტების უმეტესობა თვლის, რომ საარჩევნო კამპანია დაძაბულია. მნიშვნელოვნად შეფასდა სვიფტის მხარდაჭერაც, რომელსაც სოციალური არხების მეშვეობით მილიონობით ფანის მობილიზება შეუძლია. სვიფტის ნაბიჯს მიესალმა ტიმ უოლცი და მის პოსტს „მჭევრმეტყველი„ უწოდა.
