თვეების წინ ჯასტინ ტიმბერლეიკი მანქანის სავარაუდო არაფხიზელ მდგომარეობაში მართვის დროს ჰემპტონში დააკავეს. თავდაპირველ სასამართლო პროცესზე მომღერალმა წაყენებული ბრალი უარყო, ამჯერად კი ის საგ ჰარბორ ვილიჯის სასამართლოში წარდგება, რათა საქმე საპროცესო შეთანხმებით დაასრულოს. Billboard დამატებითი ინფორმაციისათვის ტიმბერლეიკის ოფიციალურ წარმომადგენელსაც დაუკავშირდა.
ერთ თვეზე მეტი გავიდა მას შემდეგ, რაც საგ ჰარბორ ვილიჯის სასამართლომ ტიმბერლეიკის საქმე პირველად განიხილა და ბრალდებულს მართვის ლიცენზია შეუჩერა. ტიმბერლეიკის ადვოკატმა პროცესამდე მედიასთან გაკეთებული კომენტარების გამო სასამართლოსგან გაფრთხილებაც მიიღო.
როგორც სამართალდამცავები ოფიციალურ ჩვენებაში აღნიშნავენ, ვარსკვლავი დაკავებისას BMW-ის მარკის 2025 წლის ავტომობილს მართავდა. მან შესაბამის ადგილას მანქანა ვერ გააჩერა. პოლიცია ამტკიცებს, რომ ტიმბერლეიკი არაფხიზელ მდგომარეობაში იჯდა საჭესთან, მისი თვალები წითელი იყო, სუნთქვისას ალკოჰოლის სუნი იგრძნობოდა, კონცენტრაცია უჭირდა, ნელა საუბრობდა, ფეხზე დგომა უძნელდებოდა და სიფხიზლის ტესტიც ვერ გაიარა. ოფიცერმა ასევე გაიხსენა, როგორ უთხრა ჯასტინ ტიმბერლეიკმა, რომ მას ერთი ჭიქა მარტინი ჰქონდა დალეული.
მიუხედავად პოლიციის მოხსენებისა, ტიმბერლეიკის ადვოკატმა უარყო მისი კლიენტისადმი წაყენებული ბრალდება და აღნიშნა, რომ ის სრულიად ფხიზელი იყო. ადვოკატის თქმით, მისი კლიენტი პოლიციას არ უნდა დაეკავებინა. მან ისიც განაცხადა, რომ სამართალდამცავების მხრიდან საქმეში არაერთი გადაცდომა ფიქსირდება.
დაკავების პერიოდში ჯასტინ ტიმბერლეიკი საკონცერტო ტურნეს ფარგლებში მართავდა კონცერტებს. შემთხვევის შემდეგ მან შეერთებული შტატების მასშტაბით შოუები გააგრძელა, ივლისში მისმა ტურნემ ევროპაც მოიცვა. Billboard-ის მონაცემებით ტურნეს სრული შემოსავალი 250 მილიონ დოლარს გადააჭარბებს.
