ახალგაზრდა ქართული მუსიკალური დუეტის, East Duo-ს მუსიკალური ნაწარმოები მსოფლიო ჩარტებში მოწინავე ადგილზეა.
East Duo არტისტების ლევან ბანცაძისა და გიორგი მატკავას მუსიკალური პროექტია, რომელიც ლეიბლ GMI Rights Management-თან თანამშრომლობს.
დუეტმა 2024 წელს მუსიკალური ნაწარმოები სახელწოდებით „ბანცარული“ გამოაქვეყნა, რომლის მუსიკის ავტორებიც თავად არიან. ფანდურზე შესრულებული ქართული თემატიკის ჰანგები ვოკალის გარეშე სოციალურ ქსელებში ვირუსულად გავრცელდა.
მუსიკალური ნაწარმოები ინტერნეტ სივრცეში სახელწოდებით „ჩუბინა“ გავრცელდა. არტისტების გადაწყვეტილებით კი რელიზის მოდიფიკაცია მოხდა და ნაწარმოები ამ სახელით დამკვიდრდა.
დღეს ნაწარმოები shazam-ის მუსიკალურ აპლიკაციაში მსოფლიო მასშტაბით 52-ე ადგილს იკავებს.
ქართული მუსიკალური ნაწარმოები წინ უსწრებს ისეთ არტისტების კომპოზიციებს, როგორიცაა Post Malone, Tom Odell, Gotye, Lady Gaga, Adele, Lana Del Rey და სხვები.
მასზე ყველა სოციალურ ქსელში უამრავი ვიდეო კეთდება, რომელიც ვირუსულად ვრცელდება.
მუსიკალური ნაწარმოები განსაკუთრებული პოპულარობით სარგებლობს ინდოეთში, მაროკოში, ალჟირში, ყაზახეთში, უზბეკეთში, პაკისტანში, არაბეთის გაერთიანებულ საემიროებში და ახლო აღმოსავლეთის სხვა ქვეყნებში.
სანდრო აბრამიძე GMI ლეიბლის მენეჯერი
„აღნიშნული ნაწარმოები, რომელიც ესე ვირუსულად გავრცელდა ჩაწერილია მხოლოდ მობილურით და მართლაც რომ მოლოდინებს გადააჭარბა, არტისტებმა ჩვენს ლეიბლთან თანამშრომლობა 2024 წლის ივლისის თვეში დაიწყეს. რაც შეეხება იმას თუ როგორ გავრცელდა ნაწარმოები მსოფლიოს მასშტაბით, წინასწარ არანაირი გეგმა არ იყო შემუშავებული, თუმცა ხალხმა ძირითადად TikTok-ის მეშვეობით აიტაცა, რადგან ძალიან ტრენდული აღმოჩნდა და დღემდე ასეა.“
ინდოეთში 5 სექტემბრიდან 13 სექტემბრამდე შაზამის ჩარტებით ნაწარმოები პირველ ადგილზე იყო, დღეის მონაცემებით კი ის მე-3 ადგილს იკავებს.
მუსიკალური ნაწარმოები შაზამის რეიტინგებში ასევე იკავებდა მე-2 ადგილს მაროკოში, მე-3 ადგილს ალჟირში, ყაზახეთსა და უზბეკეთში, მე-6 ადგილს აზერბაიჯანსა და არაბეთის გაერთიანებულ საემიროებში. დეტალური რეიტინგები იხ, ქვემოთ.
Spotify-ზე ნაწარმოები სხვადასხვა დღეებში მოხვდა ასევე ხსენებულ ქვეყნებში Spotify Daily Viral 100-ის ჩარტებში და რამდენიმე კვირაში 1 555 000 ნახვა მოაგროვა.
მუსიკალურ ნაწარმოებზე შეიმქნა ათასობით ვიდეო სოციალურ ქსელებში.
მხოლოდ ტიკ-ტოკზე ნაწარმოებზე 200 000-ზე მეტი ვიდეოა შექმნილი, რამაც ჯამში 356 მილიონი ნახვა და 20 მილიონზე მეტი მოწონება დააგენერირა.
