გიორგი მარდალეიშვილი წარმატებული ქართველი მუსიკოსია, რომელიც კლასიკურ მუსიკალურ საკრავ ვიოლაზე უკრავს. მუსიკის სამყაროში გიორგიმ ადრეულ ასაკშივე შეაბიჯა, როცა მუსიკალურ ათწლედში თავდაპირველად ფორტეპიანოსა და ვიოლინოზე სცადა ბედი, საბოლოოდ კი ვიოლაზე შეაჩერა არჩევანი. მუსიკოსმა თბილისის სახელმწიფო კონსერვატორია პროფესორ ნოდარ ჟვანიას ხელმძღვანელობით დაასრულა და 2022 წელს ვენის მუსიკისა და საშემსრულებლო ხელოვნების უნივერსიტეტში (MDW), ჩააბარა.
კარიერის განმავლობაში გიორგი მარდალეიშვილს არაერთი წარმატება ჰქონია. იგი არის ერთ-ერთი ყველაზე მოთხოვნადი მუსიკოსი, თანამშრომლობს საქართველოს ეროვნულ მუსიკალურ ცენტრთან და საქართველოს ფილარმონიულ ორკესტრთან, მონაწილეა მრავალი კონცერტისა თუ ფესტივალის, როგორც სოლისტის, ასევე კამერული ანსამბლის წევრის სტატუსით.
აღსანიშნავია რომ გიორგი მარდალეიშვილი წინანდლის ფესტივალთან 2019 წლიდან, მისი დაარსების დღიდან თანამშრომლობს და პან-კავკასიური ახალგაზრდული ორკესტრის (PCYO) მთავარი ვიოლისტია. მას ჰქონდა პატივი, ემუშავა ისეთ ცნობილ დირიჟორებთან, როგორებიც არიან ჯანანდრეა ნოზედა, ლაჰავ შანი, მანფრედ ჰონეკი, შარლზ დიუტუა, ვასილი პეტრენკო, იუკა-პეკა სარასტე და სხვები.
გიორგი არის რამდენიმე მუსიკალური კონკურსის პრიზიორი, მათ შორის ოთარ თაქთაქიშვილის სახელობის საერთაშორისო მუსიკალურ კონკურსში მეორე ადგილის მფლობელი (2018) და მე-7 ქართული ეროვნული მუსიკალური კონკურსის დიპლომანტი (2019).
2024 წელს გიორგის წილად ხვდა პატივი, დასახელებულიყო ლიზა ბათიაშვილის ფონდის ახალგაზრდა ხელოვანად, რის მეშვეობითაც მან კონცერტები გამართა მთელს ევროპაში და დაუკრა ისეთ დარბაზებში, როგორიცაა ბერლინის ფილარმონია.
ნახეთ ბილბორდ საქართველოს ინტერვიუ ახალგაზრდა წარმატებულ არტისტ გიორგი მარდალეიშვილთან:
