მილანში მოდის კვირეულის მიმდინარეობისას შოუებს სხვადასხვა სფეროდან უამრავი ვარსკვლავი დაესწრო. ცნობილი მოდის სახლები და დიზაინერები 2025 წლის გაზაფხულის და ზაფხულის კოლექციებს წარადგენენ.
21 სექტემბერს Dolce & Gabbana-ს ჩვენების წინა რიგებში მადონა გამოჩნდა. ჩვენებაზე წარმოდგენილი კოსტიუმების შთაგონება სწორედ მადონას 90-იანი წლები და 1990 წლის ტურნეს ცნობილი სასცენო კოსტიუმი იყო. მოდელები პოდიუმზე ქერა პარიკით გამოდიოდნენ, რომელიც ასევე მადონას ცნობილი ვარცხნილობით იყო შთაგონებული.
თავად მადონა შოუს შავ კოსტიუმში გამოწყობილი ესწრებოდა. კოსტიუმის გამოკვეთილი დეტალი მაქმანებიანი თავსაბურავი და ოქროსფერი გვირგვინი იყო.
კოლექციის წარდგენისას მოდის სახლს კონკრეტულად მადონას სახელი არ უხსენებია, თუმცა Dolce & Gabbana და მადონა ერთმანეთთან მას შემდეგ იკვეთებიან, რაც ბრენდის დამფუძნებელმა დიზაინერებმა, დომენიკო დოლჩემ და სტეფანო გაბანამ, არტისტის 1993 წლის ტურნესათვის The Girlie Show კოსტიუმები შექმნეს.
შოუს შემდეგ დიზაინერები პოდიუმზე გამოვიდნენ და სპეციალურად მიწვეულ სტუმრებს თავი დაუკრეს. მადონა კი პასუხად მათ მისასალმებლად სხვა სტუმრებთან ერთად ფეხზე წამოდგა.
