აგვისტოში Massive Attack-მა მშობლიურ ქალაქ ბრისტოლში თავისი ახალი პროექტის, Act 1.5-ის პირველი შოუ გამართა. კონცერტი Clifton Park-ში ჩატარდა. შოუ მთელი რიგი სპეციალური წესების დაცვით გაიმართა, რომლებიც ცოცხალი კონცერტების გარემოზე ზემოქმედებით გამოწვეულ ზიანს ამცირებს.
ორგანიზატორებმა და ბენდის წევრებმა მსმენელებს მოუწოდეს, კონცერტზე დასასწრებად საზოგადოებრივი ტრანსპორტი გამოეყენებინათ. Massive Attack-ის კონცერტზე ადგილობრივებს ბილეთები სპეციალური პირობებით შესთავაზეს და შოუს უზრუნველსაყოფად 100%-ით განახლებადი ენერგია გამოიყენეს.
ახლახან Massive Attack-მა ლივერპულში სპეციალური კონცერტების სერია დააანონსა. ამას წინ უძღოდა გაერთიანებული ერების განცხადება, რომ ლივერპული ახალი პროგრამის აქსელერატორ ქალაქად გამოცხადდა. პროგრამა გართობის ინდუსტრიასა და კულტურის სექტორში ეკომეგობრული მიდგომების დანერგვით კლიმატურ გარემოზე ზრუნვას გულისხმობს. შოუები ლივერპულში ნოემბრის განმავლობაში ჩატარდება.
სამი დღის განმავლობაში IDLES, Massive Attack და Nile Rodgers & Chic ლივერპულის M&S Bank Arena-ზე გამართავენ კონცერტებს. როგორც Massive Attack აღნიშნავს, ამ შოუებზე გამოიყენებენ და დატესტავენ ისეთ ტექნოლოგიებს, რომლებიც მნიშვნელოვნად შეამცირებს გასართობი შოუებისაგან გამოწვეულ ნახშირბადის გამონაბოლქვსა და ჰაერის დაბინძურების დონეს.
კონცერტები შედარებით ადრე დაიწყება და ადრე დასრულდება, რათა მათზე დასასწრებად მისულმა მსმენელებმა სახლებში დაბრუნება საზოგადოებრივი ტრანსპორტით შეძლონ. ამ შემთხვევაშიც სცენის ტექნიკური აღჭურვილობა ეკომეგობრული იქნება და შოუ სრულად განახლებადი ენერგიის წყაროების გამოყენებით ჩატარდება.
Massive Attack-ის რობერტ დელ ნაჯამ, რომელიც ასევე ცნობილია სახელით 3D, განცხადებაში აღნიშნა: „ბრისტოლში გამართულმა ჩვენმა შოუმ დაამტკიცა, რომ მუსიკალური ღონისძიებები, შესაძლოა, სრულად იყოს პარიზის შეთანხმებასთან ადაპტირებული და ამ ცვლილებას აუდიტორიაც ენთუზიაზმით მიიღებს. ლივერპულის კონცერტი და გაერთიანებული ერების ეს აღიარება ნიშნავს, რომ შეგვიძლია, მეტად ვკონცენტრირდეთ საპილოტე პროექტებსა და ექსპერიმენტებზე.”
