მსმენელის 16-წლიანი ლოდინის შემდეგ The Cure ახალი მუსიკით სცენას დაუბრუნდა. ბენდმა გასულ კვირას სიმღერა Alone გამოუშვა, ახლა კი კიდევ ერთი ტრეკის, Endsong-ის თიზერი გაავრცელა. 15-წამიანი ინსტრუმენტული ფრაგმენტი ჯგუფმა ინსტაგრამის ისტორიაში ატვირთა.
The Cure-ის მსმენელი დაანონსებულ ახალ სტუდიურ ალბომსაც ელის, რომლის სახელია Songs of a Lost World. სექტემბრის ბოლოს ჯგუფმა სოციალური ქსელების ოფიციალურ ანგარიშებზე ვიდეო გამოაქვეყნა, რომელშიც ვოკალისტი რობერტ სმითი ახალ ნამუშევარზე საუბრობს. მუსიკოსის თქმით, მას ბენდის მე-14 ალბომის ჩაწერის ოფიციალური დრო არც ახსოვს, რადგან მასზე მუშაობა დიდი ხნის განმავლობაში მიმდინარეობდა. The Cure-ს 16 წელია, რაც ალბომი არ გამოუცია. მათი ბოლო სტუდიური ნამუშევარი, სახელწოდებით 4:13 Dream, 2008 წელს გამოვიდა
.
STREAM THE OPENING TRACK 'ALONE' FROM #SONGSOFALOSTWORLD NOW AT https://t.co/vNF9TxgEPg pic.twitter.com/alWBKq1IUA
— The Cure (@thecure) September 27, 2024
„ერთადერთი, რასაც ვნანობ, ის არის, რაც 2019 წელს ვთქვი,”- აღნიშნა სმითმა. საუბარი ეხება 2019 წლის ინტერვიუს, როდესაც მან საკუთარი თავი სიმღერების მუდმივ გადაკეთებასა და მუშაობის პროცესის ზედმეტად გაგრძელებაში დაადანაშაულა მაშინ, როდესაც დედის, მამისა და ძმის დაკარგვას გლოვობდა.
სმითის თქმით, საერთოდ არ უნდა ესაუბრა ალბომზე, რადგან ბენდს მუშაობა ახალი დაწყებული ჰქონდა. რობერტ სმითმა აღნიშნა, რომ ბენდის მაშინდელი გეგმა სხვადასხვა გარემოებების გამო შეფერხდა. მისი თქმით, ალბომის დასრულების მთავარი გასაღები ბენდმა მაშინ იპოვა, როცა მან პროექტის გამხსნელი და ფინალური სიმღერა დაასახელა.
„თუ ამას ვაკეთებ, ესე იგი ვფიქრობ, რომ ნახევარი საქმე უკვე დასრულებულია. ეს ალბომის მთავარი გასაღებია,” – აღნიშნავს არტისტი.
Alone და Endsong შევა The Cure-ის ალბომში Songs of a Lost World, რომელიც პირველ ნოემბერს უნდა გამოიცეს. ჩანაწერში შესული სიმღერების სრული სია ჯერჯერობით ცნობილი არ არის. Songs of a Lost World-ის პროდიუსერები სმითი და პოლ კორკეტი არიან, რომლებმაც ასევე ერთობლივად იმუშავეს 2000 წლის ალბომზე – Bloodflowers.
