მას შემდეგ, რაც Oasis-მა Live ’25-ის მსოფლიო ტურნეთი დაბრუნება დააანონსა, ბენდს არცერთი ინტერვიუ არ ჩაუწერია. ლიამ გალაგერის თქმით, მას და მის უფროს ძმას, ნოელ გალაგერს არ აქვთ სურვილი, ჟურნალისტებმა განაახლონ მათი კონფლიქტი, რასაც ჯგუფის დაშლა და 16-წლიანი პაუზა მოჰყვა. სწორედ ამის გამო გალაგერები დუმილს ინარჩუნებენ.
„არ გვინდა ინტერვიუები, რადგან ვშიშობთ, რომ მედია ჩვენს ურთიერთობაში პრობლემებს ეძებს და ჟურნალისტები პირად კითხვებს დაგვისვამენ,” – დაწერა ლიამმა 10 ოქტომბერს. ამ პოსტს მსმენელები გამოეხმაურნენ.
„მგონია, ნოელს არ უნდა შენთან ერთად ინტერვიუების ჩაწერა, რადგან უფრო მხიარული ხარ,“ – წერს ერთ-ერთი ფანი. ლიამი კომენტარების სექციაში გაჟღერებულ მოსაზრებებსა და კითხვებსაც გამოეხმაურა. „არ შემიძლია ამაში ძალისხმევის ჩადება,“ – განმარტა მუსიკოსმა და დააზუსტა, რომ მათ ერთობლივ ინტერვიუს ვერც ერთი მედია ვერ ჩაწერს.
გასულ თვეს, ლიამ გალაგერს ერთ-ერთმა ფანმა ჰკითხა, თუ აპირებდა „ნოელზე სისულელეების წერის“ შეწყვეტას. ლიამმა კი უპასუხა: „ყველაფერი დასრულებულია, მშვიდობამ გაიმარჯვა, ის საუკეთესოა”. „ვერ ვითმენ, სცენაზე გამოვიდე მასთან ერთად და თითოეული სიმღერის შემდეგ კოცნა გავუგზავნო.“
Oasis 2009 წელს დაიშალა. ცოტა ხნის წინ კი 2025 წლის ტურნეთი დაბრუნების შესახებ განაცხადა. ორი კონცერტი ჩატარდება ავსტრალიაში – მელბურნსა და სიდნეიში . ”კეთილი იყოს თქვენი მობრძანება. Oasis ავსტრალიას 2025 წელს ესტუმრება!“- განაცხადა ბენდმა.
გალაგერები ტურნეს ფარგლებში ჩრდილოეთ ამერიკასაც ეწვევიან. კონცერტები გაიმართება ტორონტოში, ჩიკაგოში, ნიუ ჯერსიში და ლოს ანჯელესში.
ტურნე დიდი ბრიტანეთისა და ირლანდიის კონცერტებით დაიწყება, რომლებიც 4-5 ივლისს კარდიფის Principality Stadium-ზე ჩატარდება, შემდეგ კი ხუთი საკონცერტო ღამით Oasis მშობლიურ ქალაქს, მანჩესტერს ეწვევა.
