Tyler, the Creator დაბრუნდა. გრემის მფლობელმა რეპერმა მერვე სტუდიური ალბომის გამოსვლა დააანონსა. ალბომი, სახელწოდებით Chromakopia, ოქტომბრის ბოლოს გამოვა.
ცოტა ხნის წინ მუსიკოსმა შემოქმედების ახალი ეტაპის დაწყების შესახებ გულშემატკივარს სოციალურ ქსელში გამოქვეყნებული St. Chroma-ს ვიდეოთი ამცნო. ახლა კი მან გამომწერებს ალბომის ქავერი და მისი გამოსვლის თარიღი გაუზიარა – 28 ოქტომბერი, რაც იმას ნიშნავს, რომ გრემის მფლობელი რეპერის მერვე სტუდიური ალბომი ორშაბათ დღეს გამოვა, ახალი მუსიკის გამოცემისთვის საერთაშორისოდ დათქმული პარასკევის ნაცვლად.
„ყველა სიმღერის შემქმნელი, პროდიუსერი და არანჟირების ავტორი ტაილერ ოკონმაა,” – ვკითხულობთ ალბომის ყდაზე მწვანედ დატანილ ტექსტში. რაც შეეხება ალბომის ვიზუალს, ეს არის ტაილერის შავ-თეთრი ფოტო, რომელსაც ნიღაბი უკეთია ისე, როგორც ახლახან გამოქვეყნებულ St. Chroma-ს ვიდეოში.
გულშემატკივარს უკვე შეუძლია, Chromakopia-ს ვებგვერდზე შევიდეს და წინასწარ შეუკვეთოს ალბომი და მისი „მერჩენდაიზი”.
2011 წელს სადებიუტო ალბომ Goblin-ის შემდეგ, Tyler, the Creator ყოველ ორ წელიწადში ახალ ალბომს უშვებდა. ტრადიცია 2023 წელს დაირღვა და რეპერს ახალი ალბომი აღარ გამოუცია.
რაც შეეხება მის ბოლო ალბომს, Call Me If You Get Lost 2021 წლის ივნისში გამოვიდა და Billboard 200-ის პირველ ადგილზე გავიდა. ჩანაწერმა 2022 წელს რეპერს გრემი მოუტანა საუკეთესო რეპალბომის კატეგორიაში.
Chromakopia-ს გამოცემის შემდეგ, ნოემბერში, ტაილერი Camp Flog Gnaw Carnival-ზე ჰედლაინერად წარდგება. სავარაუდოდ, ფესტივალზე რეპერი სიმღერებს ახალი ალბომიდანაც შეასრულებს.
ნახეთ Chromakopia-ს ქავერი:
