31 ოქტომბერს გიორგი გიგაშვილი მსოფლიოს ერთ-ერთი ყველაზე ცნობილი და პრესტიჟული საკონცერტო დარბაზის, კარნეგი-ჰოლის სცენაზე სოლო კონცერტით წარდგება. ღონისძიებამდე ერთი დღით ადრე ქართველი პიანისტი სოციალურ ქსელში კონცერტის აფიშის ფოტოს აქვეყნებს, რომელზეც მითითებულია, რომ ბილეთები სრულად გაყიდულია.
„ვდგავარ ჩემი სრულად გაყიდული კონცერტის აფიშის წინ და სავსე ვარ მადლიერებითა და ბედნიერებით, რომ მაქვს საშუალება, ჩემი მუსიკა ნიუ-იორკს გავუზიარო,” – წერს გიგაშვილი ინსტაგრამის პოსტში, სადაც ის ასევე ეხმაურება საქართველოში ამჟამად განვითარებულ მოვლენებს და ხაზს უსვამს საქართველოსა და აშშ-ს საერთო კულტურულ ღირებულებებს.
„მადლობა ნიუ-იორკს ჩემი მიღებისთვის. მაქვს იმედი და შემართება, რაც შთაგონებულია საქართველოსა და აშშ-ის მეგობრობით.”
კონცერტზე ქართველი პიანისტი შეასრულებს სკარლატის, შუმანისა და პროკოფიევის სონატებს, ასევე შოპენის საფორტეპიანო ბალადას. ღონისძიება არტურ რუბინშტეინის საერთაშორისო მუსიკალური საზოგადოების ამერიკელი პარტნიორების ორგანიზებით ტარდება. შეგახსენებთ, რომ გიორგი გიგაშვილი 2023 წლის რუბინშტეინის საფორტეპიანო კონკურსის ვერცხლის პრიზიორია.
