სახელგანთქმული მევიოლინე გიდონ კრემერი ქართველი მსმენელის წინაშე კიდევ ერთხელ წარდგება. 7 ნოემბერს კრემერი კონცერტს თბილისის ახალგაზრდულ ორკესტრთან ერთად კონსერვატორიის დიდ დარბაზში გამართავს. კონცერტს ორკესტრის სამხატვრო ხელმძღვანელი და მთავარი დირიჟორი მირიან ხუხუნაიშვილი უდირიჟორებს.
ლეგენდარულ მევიოლინეს გია ყანჩელთან დიდი ხნის მეგობრობა და შემოქმედებითი საქმიანობა აკავშირებდა. თბილისის ახალგაზრდული ორკესტრი კი სწორედ მაესტრო გია ყანჩელის სახელს ატარებს, შესაბამისად, ორკესტრისთვის ამ კონცერტს დიდი მნიშვნელობა აქვს. აღსანიშნავია, რომ მაესტრო კრემერი იყო გია ყანჩელის ნაწარმოებების პირველი შემსრულებელი და მასვე ეკუთვნის მისი არაერთი სავიოლინო თხზულების პირველი ჩანაწერი.
რაც შეეხება კონცერტის პროგრამას, პირველ განყოფილებაში შესრულდება გია ყანჩელის Twilight და შუბერტის პოლონეზი. სოლისტები იქნებიან გიდონ კრემერი და მადარა პეტერსონე, ხოლო მეორე განყოფილებაში შესრულდება ვაინბერგის სავიოლინო კონცერტი.
თბილისის ახალგაზრდული ორკესტრი სულ ცოტა ხნის წინ დაბრუნდა ორკვირიანი ტურნედან, სადაც ქართული და გერმანული მუსიკის პროგრამით წარდგა მსმენელის წინაშე. ორკესტრმა კონცერტები გამართა ისეთ ხელოვანებთან, როგორებიც არიან ვერიკო ჭუმბურიძე, ისაკ რიხარდსონი და ლიზი ნამჩევაძე. ტურნეს ფარგლებში ორკესტრმა ასევე ითანამშრომლა გერმანიის წამყვან ცეკვის აკადემიასთან, სახელწოდებით Eurithmeum Stuttgart. შვიდი კონცერტი გაიმართა გერმანიასა და შვეიცარიაში, მათ შორის ისეთ პრესტიჟულ დარბაზებში, როგორიცაა: შტუტგარტის Liederhalle, ბერლინის Admiralspalast და დორნახის Goetheanum.
აღსანიშნავია, რომ ორკესტრისთვის ნაყოფიერი და წარმატებული იყო 2024 წლის სეზონი, რომლის ფარგლებშიც არაერთი მნიშვნელოვანი მუსიკალური საღამო ჩატარდა. მათ შორის არის: თორაძის საერთაშორისო მუსიკალური ფესტივალი მაესტრო პაავო იარვისთან ერთად; International Piano Masters ლუი შვიცგებელთან და დათუნა ალადაშვილთან ერთად; ასევე დებიუტი „წინანდლის ფესტივალზე” მაესტრო კლაუდიო ვანდელისთან და პიანისტ ბრიუს ლიუსთან ერთად.
კონცერტზე დასასწრები ბილეთების შესაძენად, ეწვიეთ ბმულს.
