მართალია, კაილი მინოუგი თავისი ახალი ჰიტების წარმატებით ტკბება ბოლო ალბომიდან Tension II, თუმცა პოპვარსკვლავმა აღიარა, რომ 90-იანი წლების უბრალო დღეები ენატრება.
The Times-თან გულწრფელ ინტერვიუში 56 წლის მომღერალმა სოციალურ მედიამდე არსებულ ეპოქაზე ისაუბრა.
„ყველაფერი მენატრება 1990-იანი წლებიდან,” – აღნიშნა მინოუგმა. „არ იყო ტელეფონები, საცეკვაო მუსიკა პოპულარობის ზენიტში იყო და მეც ამ მოვლენების ცენტრში ვიყავი. დავდიოდით ბევრს – კლუბებში, ჩვენებებზე.”
მინოუგისთვის სოციალური მედიის არარსებობა გარკვეული ტიპის თავისუფლებას წარმოადგენდა, რომელიც მას საშუალებას აძლევდა, სრულად შეეგრძნო კონკრეტული მომენტი, ყურადღების ციფრული გადამტანების გარეშე. „დროს არ ვკარგავდი სოციალური ქსელების სქროლვაში ან ზრდასრულისთვის შესაფერის ქცევაზე ფიქრში. ასე რომ, ბევრი რამ მენატრება. საერთო ჯამში – თავისუფლება.”
მინოუგმა საკუთარ ახალგაზრდა თავს რჩევაც მისცა: „მე მას ვეტყოდი: გაერთე. წინ ბევრი რამ გელოდება. იქნება ბევრი დაბრკოლება და თუ მათ ვერ გადაახტები, იპოვი გზას, რომ მათ ქვეშ გაძვრე, ან შემოუარო. გზას აუცილებლად იპოვი.”
მინოუგი უკვე შემოქმედების მეოთხე ათწლეულს ითვლის, თუმცა ბოლო ალბომით ის ამტკიცებს, რომ მისი კარიერა დასასრულისგან ჯერ კიდევ შორს არის. ალბომი ავსტრალიისა და ბრიტანეთის ჩარტებში პირველ ადგილზე გავიდა.
მომღერალი მალე 2025 წლის მსოფლიო ტურნეშიც გაემგზავრება. „ბილბორდთან” საუბარში მან გაამხილა, რომ ტურნეში როგორც ბოლო ალბომის სიმღერებს, ასევე კარიერის ყველა დეკადის ჰიტებს შეასრულებს. მათ შორის იქნება The Loco-Motion-ის ქავერი – სიმღერა, რომლითაც მისი კარიერა დაიწყო და 1988 წელს Billboard Hot 100-ის მესამე ადგილზე გავიდა. „ეს არის სიმღერა, რომლითაც ჩემი კარიერა დაიწყო,” – უთხრა მინოუგმა „ბილბორდს” ოქტომბერში. „იყო პერიოდი, როცა ვფიქრობდი, რომ არ ვიცოდი, როგორ მემღერა ის, თუმცა ახლა ყველაფერი ერთ წრედ შეიკრა. ახლა მთელი გულითა და ენთუზიაზმით შემიძლია ამ სიმღერის შესრულება.”
