„მაიკლ ჯექსონს მიმართულება სჭირდებოდა. პირველად რომ სახლში მესტუმრა, მითხრა: Epic Records-თან ჩემს პირველ სოლო ალბომს ვწერ. ვიფიქრე, იქნებ შეგიძლია პროდიუსერი მომიძებნო?’” – იხსენებს ქუინსი ჯონსი თავის ავტობიოგრაფიულ წიგნში, სახელწოდებით Q, რომელიც 2001 წელს გამოიცა.
ჯონსი, რომელსაც უბადლო მუსიკალური მრავალფეროვნება და ნიჭი ჰქონდა, თავად გახდა ამ ალბომის პროდიუსერი. ლეიბლი, რომელთანაც მაიკლ ჯექსონი თანამშრომლობდა, ამ იდეას ეწინააღმდეგებოდა, რადგან მიაჩნდა, რომ ქუინსი ჯონსზე ჯაზის გავლენა ზედმეტად დიდი იყო. საბოლოოდ ჯექსონისა და ჯონსის თანამშრომლობის შედეგად შეიქმნა ისეთი ალბომები, როგორებიცაა Off the Wall, Thriller და Bad. ამ ნამუშევრებმა ორი ხელოვანის მჭიდრო მუსიკალური კავშირი განაპირობა.
მიუხედავად იმისა, რომ ჯექსონის გაჩენა მუსიკალურ სამყაროში დიდი მოვლენა იყო და არტისტმა რეკორდულ გაყიდვებს მიაღწია, ამ წარმატებამ ჯონსის კარიერის დიდი მასშტაბი და 1970-80-იანი წლების მუსიკაში მისი მიღწევები გარკვეულწილად გადაფარა და მუსიკაში ის ძირითადად ჯექსონთან ასოცირდება. თავის მხრივ ჯექსონს ჯონსი საუკეთესო მუსიკალური ჩანაწერების შესაქმნელად მართლაც ძალიან სჭირდებოდა. პარალელურად კი ჯონსს ამ დროისათვის ჯექსონისაგან დამოუკიდებელი დიდებული კარიერა ჰქონდა. მისი პროდიუსერობით შექმნილი სხვა ალბომებიც, როგორებიცაა Brothers Johnson-ის, ჯორჯ ბენსონის, ჩაკა ხანისა და დონა სამერის ნამუშევრები, ჯექსონის რჩეულ ჰიტებს არ ჩამოუვარდება.
ჯონსის საცეკვაო მუსიკა ენერგიულია. სიმბოლურია, რომ 1983 წელს, როდესაც ჯექსონი მთელ ამერიკას წარუდგა თავისი დამახასიათებელი სასცენო მოძრაობებით, ის სწორედ ჯონსთან თანამშრომლობით შექმნილ ნაწარმოებზე შესრულდა.
ჯონსისათვის პროდიუსერობა კოლაბორაციულ შრომას ნიშნავდა. ჯექსონთან მუშაობისთვის მან მოიხმო მუსიკოსების გუნდი, სახელწოდებით killer Q posse, რომელშიც თითოეული წევრი თავისი მიმართულების ნამდვილი ოსტატი იყო: კომპოზიტორი როდ ტემპერტონი, ხმის ინჟინერი ბრიუს სუედიანი, კლავიშისტი გრეგ ფილინგეინსი, ბასისტი ლუის ჯონსონი, დრამერი ჯონ რობინსონი, პერკუსიონისტი პაულინიო და კოსტა და ასევე ჯერი ჰეი, რომლის მიმართულება ჩასაბერი ინსტრუმენტები და არანჟირება იყო.
მუსიკოსთა ჯგუფი Off the Wall-ის შექმნაზე მუშაობდა, რომელიც 1979 წლის ზაფხულში გამოიცა, ხოლო მოგვიანებით მათ Rufus & ჩაკა ხანის Masterjam-ზეც იმუშავეს, რომელიც იმავე წლის შემოდგომაზე გამოვიდა. ალბომის მეორე ტრეკი, Any Love, აერთიანებს ჯონსის უნარებს, რომლებიც მსმენელში დიდ ემოციებს აღძრავს.
1980 წელს killer Q posse ჯონსთან კვლავ გაერთიანდა, რათა შეექმნათ კიდევ ორი ალბომი: Brothers Johnson-ის Light Up the Night და ჯორჯ ბენსონის Give Me the Night. ორივე ალბომი ღამის კლუბების სამყაროსათვის იყო განკუთვნილი, სადაც ენერგიული და მრავალფეროვანი ჟღერადობა უნიკალურ ატმოსფეროს ქმნის.
1982 წელს დონა სამერმა, რომელმაც ჯონსთან თანამშრომლობა გადაწყვიტა, სინგლი Love Is in Control (Finger on the Trigger) ჩაწერა, რომელშიც ქუინსი ჯონსისათვის დამახასიათებელი ხელწერის ყველა დეტალი იგრძნობა. ეს ტრეკი მუსიკალური ჩარტების ათეულში მოხვდა, თუმცა ჯონსისისათვის ასეთი შედეგი, სავარაუდოდ, მაინც არ იყო დამაკმაყოფილებელი, რადგან მისთვის ნამდვილად მნიშვნელოვანი მხოლოდ პირველი პოზიცია იყო.
ავტობიოგრაფიულ წიგნში Q ჯექსონზე დიდი ყურადღებაა გამახვილებული. ქუინსი ჯონსი ამაყობს ჯაზის ჟანრში შექმნილი ნაწარმოებებით და ფილმისთვის დაწერილი მუსიკით, თუმცა 1970-80-იანი წლების არაერთი უნიკალური ალბომი, რომელიც მისი პროდიუსერობით შეიქმნა, წიგნში ფაქტობრივად არ არის გამოკვეთილი.
