მაიკ ტაისონი ჯეიკ პოლის წინააღმდეგ რინგზე დაბრუნდა. მათი შეხვედრა 15 ნოემბერს გაიმართა. ორთაბრძოლის წინ მაიკ ტაისონი განსაკუთრებით აქტიური იყო და ინტერნეტში არაერთი ვირუსული მომენტიც შექმნა, რასაც რეპერი 50 Cent გამოეხმაურა.
ყველაფერი მაშინ დაიწყო, როდესაც ტაისონი ინტერვიუს 14 წლის ჟურნალისტ Jazzy-ს აძლევდა. სპორტსმენი საუბრისას მემკვიდრეობასა და ეგოს შორის განსხვავებას შეეხო. ტაისონის თქმით, სიცოცხლის დასრულების შემდეგ ყველაფერი უმნიშვნელო ხდება: „არ ვიცი. სიტყვა „მემკვიდრეობას” არ ვცნობ. ეს უბრალოდ ეგოს სხვა სახელწოდებაა. მემკვიდრეობას ჩემთვის არავითარი მნიშვნელობა არ აქვს. ეს სიტყვა ვიღაცამ მოიფიქრა და ყველამ გაიმეორა. ახლა ყოველ ხუთ წამში ახსენებენ ამ სიტყვას, მაგრამ ეს არაფერს ნიშნავს. ერთხელაც მოვკვდები და ყველაფერი დასრულდება. ვის აინტერესებს მემკვიდრეობა ამის შემდეგ? ეს ეგოისტური სურვილია. რატომ უნდა ვიფიქრო, რომ როცა მოვკვდები, ხალხი იტყვის, თუ რა „დიდი ადამიანი” ვიყავი? ჩვენ არაფერს წარმოვადგენთ. მოვკვდებით და მტვრად ვიქცევით. ჩვენი მემკვიდრეობა არაფერია,“ – აღნიშნა ინტერვიუში ტაისონმა.
Goddam it ! Mike ya scaring the kids, WTF 🥷🏾chill 🤨. Note to self, keep the kids away from Mike • https://t.co/0nT7heDPcR pic.twitter.com/n3XiLqtdvf
— 50cent (@50cent) November 15, 2024
Jazzy-მ, რომელიც ჯერ მხოლოდ თინეიჯერია, სპორტსმენს გაუმხილა, რომ მსგავსი აზრი მანამდე არ მოუსმენია. ინტერვიუს სხვა ნაწილში ჟურნალისტმა მაიკ ტაისონს მისი მოწინააღმდეგის, ჯეიკ პოლის შესახებაც ჰკითხა. „დიდად არ ვფიქრობ მასზე,“ უპასუხა სპორტსმენმა, თუმცა დასძინა, რომ პოლი „ძალიან სასაცილოა.“
ეს ინტერვიუ სოციალურ მედიაში სწრაფად გავრცელდა და 50 Cent-მა ტაისონის ნათქვამი თავისებურად შეაფასა. რეპერმა აღნიშნა, რომ მაიკ ტაისონი ბავშვებს აშინებს. „ჯანდაბა! მაიკ, ბავშვებს აშინებ. დამშვიდდი. შენიშვნა: ბავშვები მაიკს უნდა მოვარიდო,“ დაწერა არტისტმა სოციალურ ქსელ X-ზე.
ამ ყველაფერს ტაისონის კიდევ ერთი სკანდალური მომენტი მოჰყვა. წონაში გასინჯვის ოფიციალურ ღონისძიებაზე ტაისონს მოეჩვენა, რომ ჯეიკ პოლმა ფეხზე შემთხვევით დააბიჯა. ამან მაიკის გაღიზიანება გამოიწვია და მან მეტოქეს სახეში გაარტყა.
50 Cent-ს ეს შემთხვევაც არ გამოჰპარვია და ძველი ინტერვიუს ვიდეო ატვირთა, რომელშიც ტაისონი აღიარებს, როგორ სძულს, როცა ვინმე ფეხზე აბიჯებს: „თუ ვინმე ფეხზე დამაბიჯებს, ყველაფერზე ხელს ავიღებ,“ ამბობს ვიდეოში ტაისონი.
„აი, თუ უფროს კაცს ფეხზე დააბიჯებ, სიტუაცია კონტროლს დაკარგავს,“ – დაწერა 50 Cent-მა ვიდეოს აღწერაში.
