12 და 13 ნოემბერს ფესტივალ „საჩუქარის” ფარგლებში ბერძენი რეჟისორის, ევრიპიდის ლასკარიდისის სპექტაკლი „ლაპის ლაზული” გაიმართა. წარმოდგენა ლასკარადისისა და თეატრ „ოსმოსისის” უახლესი ერთობლივი ნამუშევარია, რომლის პრემიერაც ათენში 2024 წლის აპრილში შედგა. ამჟამად კი დასი მსოფლიო ტურნეში იმყოფება, რომლის ნაწილი საქართველოც გახდა.
„ლაპის ლაზული” სრულიად თანამედროვე წარმოდგენაა, რომელიც აერთიანებს თეატრს, ქორეოგრაფიასა და ვიზუალურ ხელოვნებას. რეჟისორი, რომელიც თავადვეა მთავარი როლის შემსრულებელი, თავისი გაორებული, ერთსა და იმავე დროს საშიშისა და სასაცილო პერსონაჟით, ცდილობს წარმოაჩინოს ასევე გაორებული სამყარო, რომელშიც ერთმანეთში ირევა რეალობა და ფანტაზია, ცნობიერი და არაცნობიერი, საოცნებო და საზარელი. ამ მიზანს კი ის მინიმალური ვერბალური ნაწილითა და დატვირთული სცენოგრაფიით აღწევს, რომელიც ადრეული საშინელებათა ფილმების, ივ კლაინისა და იაპონური კულტურის ესთეტიკას აერთიანებს.
ლაპის ლაზული (Lapis Lazuli) ნახევრად-ძვირფასი მეტამორფული ქვაა, რომლის ლურჯი პიგმენტიც მუდმივად გამოიყენებოდა ხელოვნებაში. ამის გარდა, ის მაღალი წნევის ქვეშ არაპროგნოზირებადი ქცევითაა ცნობილი, რაც ზუსტად ასახავს ლასკარიდისის უახლეს ნამუშევარს.
ნახეთ Billboard საქართველოს სიუჟეტი სპექტაკლის შესახებ:
