რობი უილიამსმა Take That-ის ყოფილ მენეჯერ ნაიჯელ მარტინ-სმითს ღია წერილი მისწერა მას შემდეგ, რაც მან „ბიბისის” ახალ დოკუმენტურ სერიალში Boybands Forever მომღერლის მიერ ნარკოტიკების მოხმარებაზე ისაუბრა.
მარტინ-სმითთან ერთად თავად უილიამსიც მონაწილეობს სამ-ნაწილიანი სერიალის პირველ ეპიზოდში, რომელიც ეთერში 16 ნოემბერს გავიდა. ეპიზოდი ეხებოდა ფინანსურ და მენტალურ პრობლემებს, რომლებთან გამკლავებაც ჯგუფებს Take That, East 17, A1 და Damage პოპულარობის ზენიტში უწევდათ.
მარტინ-სმითი Take That-ის მენეჯერად 1990-იან წლებში მუშაობდა, როცა რობი უილიამსი ჯგუფის წევრი იყო, სანამ 1995 წელ ბენდს დატოვებდა და წარმატებულ სოლო კარიერას წამოიწყებდა.
ფილმში თავად უილიამსი მის მიერ ნარკოტიკების მოხმარებაზე საუბრობს და აღნიშნავს, რომ რაღაც ეტაპზე მისგან „ბოროტის” ხატს ქმნიდნენ. მარტინ-სმითი კი ამბობს, რომ მომღერალი საკმაოდ „გონიერი და ჭკვიანი იყო”, რათა თავისი პრობლემები იმისთვის გადაებრალებინა, რომ თითქოს „ისეთ ბენდში იყო, სადაც მას არ შეეძლო ჰყოლოდა მეგობარი გოგონა ან ევლო გასართობად.”
ამ განცხადებას უილიამსი ინსტაგრამის ვრცელი პოსტით გამოეხმაურა. „შენთან ერთად ეკრანის კიდევ ერთხელ გაზიარება ჩემთვის ერთდროულად შიშისმომგვრელი და აღმაფრთოვანებელი იყო,” – მიმართა მან მარტინ-სმითს. „აღმაფრთოვანებელი იმ კუთხით, რომ დავინახე ის, თუ სად ვდგავართ ახლა ორივე ამ მოგზაურობაში. ხოლო შიშისმომგვრელი იმ კუთხით, რომ შესაძლოა ჩემში ძველი ემოციები გაეღვიძებინა და ისევ გაბრაზებული და გულნატკენი ვყოფილიყავი.”
„ჩემი პასუხი დამახინჯებულ სამყაროს, რომელიც იმ დროს გარს მეკრა, მხოლოდ მე მეკუთვნის. ის, თუ როგორ გადავწყვიტე ჩემი თავის მდგომარეობიდან გამოყვანა, იყო და არის ის, რასთან გამკლავებაც მთელი ცხოვრება მომიწევს. ეს ჩემი პიროვნების ნაწილია და იგივე ავადმყოფობა მექნებოდა, ტაქსის მძღოლიც რომ ვყოფილიყავი. უბრალოდ ასე უფრო სწრაფად მივედი იქამდე, რადგან მქონდა ფული მაშინ, როცა სულ ტყუილად ვცდილობდი, დავპირისპირებოდი პოპვარსკვლავობის არეული მატრიცის მქონე სარეცხის მანქანის ტურბულენტობას.”
უილიამსი მოუწოდებს მარტინ-სმითს, თავადაც აიღოს პასუხისმგებლობა იმ პრობლემებზე, რაც ჯგუფს სცენის მიღმა ჰქონდა: „ყველა გაიგებს და დაგიფასებს თვითრეფლექსიას. სირცხვილი არ არის, აღიარო შენი ნაკლი. არავინ გიჩივლებს იმისთვის, რომ არ იცოდი ან არ გესმოდა ის ფსიქოლოგიური ეფექტები, რაც იმ ყველაფერს ჰქონდა.”
მარტინ-სმითს უილიამსის წერილზე ჯერჯერობით არ უპასუხია.
ცოტა ხნის წინ უილიამსმა მსგავსი პოსტი მიუძღვნა ლიამ პეინს, სადაც წერდა, რომ ბიჭების ბენდებს საკმარისი ემოციური მხარდაჭერა სჭირდებათ. შეგახსენებთ, რომ One Direction-ის წევრი 16 ოქტომბერს სასტუმროს მესამე სართულიდან გადავარდა.
პეინის გარდაცვალებიდან მალევე მომზადდა პეტიცია ახალი კანონის მოთხოვნით, რომელიც ახალგაზრდა არტისტების მენტალურ კეთილდღეობას უზრუნველყოფს. პეტიციას ამ ეტაპზე 149 000 ხელმოწერა აქვს.
დეკემბერში რობი უილიამსის ბიოგრაფიული ფილმის, Better Man-ის საუნდრეკის კრებული გამოვა დიდ ბრიტანეთში, იანვარში კი – აშშ-სა და კანადაში. ფილმი, რომელიც უილიამსის უდიდეს ჰიტებს მოიცავს, მუსიკოსის ცხოვრების შესახებ ჰყვება მისი ბავშვობიდან მსოფლიო წარმატებამდე. ფილმში უილიამსი კომპიუტერულად შექმნილი მაიმუნის სახითაა წარმოდგენილი.
2025 წელს ლეგენდარული მუსიკოსი ბრიტანეთისა და ევროპის ტურნეში გაემგზავრება.
