ბრუნო მარსმა 20 ნოემბერს თავისი მიღწევებისა და უახლოესი კოლაბორაციების შესახებ ინსტაგრამზე სთორი გააზიარა. ლედი გაგასთან სიმღერამ Die With a Smile და Rosé-სთან ერთად სიმღერამ APT რეკორდები მოხსნა. „ჩემი გოგოები გაგა და როზი აქ ისტორიას ქმნიან” – წერს პოსტში ბრუნო მარსი.
ბურნო მარსისა და ლედი გაგას მიერ შესრულებულმა სიმღერამ Die With a Smile ბილბორდ Global 200-ში რვა კვირა გაატარა პირველ ადგილზე. სიმღერა ასევე მოხვდა ბილბორდის Pop Airplay ჩარტში და 2025 წლის გრემიზე ორ ნომინაციაზე დასახელდა: „წლის სიმღერა“ და „საუკეთესო პოპ-დუეტის ან ჯგუფის ჩანაწერი“. აგვისტოში გამოშვებულმა სიმღერამ Spotify-ს ისტორიაში ერთ მილიარდ მოსმენას ყველაზე სწრაფად მიაღწია.
ბრუნო მარსისა და Rosé -ს კოლაბორაციულმა სიმღერამ APT ასევე დაიკავა პირველი ადგილი ბილბორდ იაპონიის საუკეთესო 100-ში და ბოლო 11 წლის განმავლობაში გახდა დასავლელი მუსიკოსის მიერ შესრულებული პირველი სიმღერა, რომელმაც იაპონიის სიმღერების ჩარტში ლიდერი პოზიცია დაიკავა. სიმღერა მეოთხე კვირაა, რაც პირველ ადგილზეა როგორც ბილბორდ Global 200-ში ასევე ბილბორდ Global Excl. U.S. ჩარტებში.
სიმღერა APT K-pop ვარსკვლავის, Rosé -ს პირველი გამოშვებაა მას შემდეგ, რაც ამ თვეში არტისტმა 12-ტრეკიანი ალბომის, Rosie-ს გამოცემა დეკემბერში დააანონსა. ეს მისი პირველი სოლო ალბომი იქნება, რომლის შესახებაც მომღერალი წერს: „ამ ალბომში ჩემი სისხლი და ცრემლები ჩავაქციე და მოუთმენლად ველი, როდის მოუსმენთ ჩემს პატარა დღიურს… ამ ალბომით, იმედი მაქვს, კიდევ უფრო უკეთ გამიცნობთ. დიახ, მინდა ვთქვა, რომ ეს სრულფასოვანი ალბომია.”
