ტრევის სკოტი კოაჩელაზე ბრუნდება. რეპერმა ოფიციალურად დაადასტურა, რომ 2025 წელს ფესტივალზე გამოვა. ინფორმაცია არტისტმა მას შემდეგ გაავრცელა, რაც მისი მონაწილეობის შესახებ სოციალურ ქსელებში აქტიური განხილვა დაიწყო. როგორც ჩანს, სკოტი მსმენელს ახალ მუსიკასაც ჰპირდება.
ტრევის სკოტმა, რომელიც ასევე ცნობილია სასცენო სახელით La Flame, გაამხილა, რომ მის მუსიკალურ კარიერაში ახალი თავი იწყება, რომელსაც კოაჩელას მრავალრიცხოვანი აუდიტორიის წინაშე წარადგენს. ტრევის სკოტის თქმით, ფესტივალზე ასევე სანახაობრივი ფორმით იქნება წარმოდგენილი მის მიერ დაფუძნებული მუსიკალური ლეიბლი, სახელწოდებით Cactus Jack.
„ახალი თავი, ახალი პერფორმანსი, ახალი კოაჩელა La Flame-ისა და Cactus Jack-ისგან. „მოემზადეთ აპრილისთვის, რადგან მოვდივარ!“ – დაწერა ტრევის სკოტმა ინსტაგრამზე.
სკოტის ფანები აღფრთოვანებულები შეხვდნენ არტისტის მიერ ახალი ეპოქის დაანონსებას და იმედოვნებენ, რომ 2025 წელს ის ახალ ალბომსაც გამოსცემს.
პარალელურად კოაჩელამაც დააანონსა სრული ლაინაფი, რომელშიც ისეთი ვარსკვლავები მოხვდნენ, როგორებიც არიან Post Malone, ლედი გაგა და Green Day.
MetLife-ის სტადიონზე ოქტომბერში გამართული შოუს დროს ტრევისმა განაცხადა, რომ ეს Utopia-ს ეპოქის ბოლო კონცერტი იყო, რაც ნიშნავს, რომ 2025 წლისთვის მისი ახალი შემოქმედებითი ეპოქა იწყება.
ტრევის სკოტის ბოლო ალბომი Utopia 2023 წლის აგვისტოში გამოვიდა და გამოსვლისთანავე Billboard 200-ის ჩარტის პირველ ადგილზე აღმოჩნდა.
იხილეთ სკოტის პოსტი:
