Tyler, The Creator ის არტისტია, რომელიც არასდროს ერიდება საკუთარი აზრის ღიად გამოხატვას. ახლახან რეპერმა და პროდიუსერმა Billboard-ს ახალი ნომრისათვის ვრცელი ინტერვიუ მისცა, სადაც ჟურნალისტ რემბერტ ბრაუნთან სხვადასხვა თემაზე ისაუბრა, მათ შორის პოდკასტის წამყვანებზეც. ტაილერი, როგორც ერთ-ერთი გავლენიანი არტისტი, რომელიც სოციალურ ქსელებთან ერთად გაიზარდა, აქტიურად ურთიერთობს თაყვანისმცემლებთან ინტერნეტის მეშვეობით, თუმცა მიაჩნია, რომ ციფრულ სივრცეში ხანდახან ადამიანები, მათ შორის პოდკასტის წამყვანები, ზედმეტად ჩქარობენ აზრის გამოთქმას ისე, რომ სათანადო არგუმენტები არ აქვთ.
შემდეგ კი ტაილერმა კიდევ უფრო მეტად გააკრიტიკა პოდკასტის წამყვანები და ხუმრობით აღნიშნა, რომ გაპრეზიდენტების შემთხვევაში მათ მიკროფონებს ჩამოართმევდა: „პრეზიდენტი რომ ვიყო, პირველ რიგში ყველას ჩამოვართმევდი პოდკასტის მიკროფონებს,“ – ამბობს ტაილერი.
ეს არ არის პირველი შემთხვევა, როცა ტაილერი თანამედროვე რეპ-მედიის ლანდშაფტის მიმართ კრიტიკულია. 2023 წელს ჟურნალისტ ნარდუვართან ინტერვიუში მან თქვა: „იმ ეტაპზე ვართ, როდესაც მუსიკოსი, რომელსაც მუსიკის გამო ვიცნობთ და რომელიმე პლატფორმაზე სწორედ მუსიკის შესახებ საუბრობს დეტალურად, ხალხისგან პასუხად იღებს – რატომ აკეთებ ისევ ამას?! მაგრამ, რომ ვიჯდე და ვიღაცაზე ვჭორაობდე, ვლაპარაკობდე კონფლიქტებზე და მსგავს თემებზე, ხალხი ინტერესით მოისმენდა. არა, ისევ მუსიკაზე უნდა ვისაუბროთ. … ისაუბრეთ თქვენს ალბომზე, ისაუბრეთ თქვენს მუსიკაზე.“
წაიკითხეთ Tyler, The Creator-ის შესახებ სრული სტატია, რომელიც Billboard-ის ახალი გამოცემის მთავარი თემაა.
