ჩანაწერის პროდიუსერმა ჯეი დევიდ საკსმა, რომელიც გასულ თვეში გარდაიცვალა, მდიდარი მემკვიდრეობა დატოვა როგორც კლასიკური მუსიკის, ასევე ბროდვეის უნიკალური ჩანაწერებით. თუმცა ყველაფერი „ერთჰიტიანი” ჯგუფის წევრობით დაიწყო, რომელიც Hot 100-ის ტოპ 40-ში მოხვდა.
საკსი 16 ნოემბერს პარკინსონთან დაკავშირებული ჯანმრთელობის პრობლემის შედეგად გარდაიცვალა. პროდიუსერი 79 წლის იყო.
1983-2014 წლებში საკსს მიღებული აქვს 13 გრემი, მათ შორის რვა – კლასიკური მუსიკისთვის, ხოლო ხუთი – ბროდვეის მიუზიკლების ალბომებისთვის.
მას ოთხჯერ აქვს მოგებული ოპერის საუკეთესო ჩანაწერის ნომინაცია, ხოლო ხუთჯერ – საუკეთესო მუსიკალური შოუს ალბომის კატეგორია. ასევე მიღებული აქვს ემის ორი ჯილდო.
ყველაფერი კი 1960-იან წლებში დაიწყო, როცა საკსი ბასგიტარაზე უკრავდა ჯგუფში The Balloon Farm, რომლის ერთადერთი ჰიტიც A Question of Temperature Billboard Hot 100-ის ტოპ 40-ში მოხვდა. საკსი არ არის ჯგუფის ერთადერთი წევრი, რომელმაც მუსიკალური ინდუსტრიაში წარმატებას მიაღწია: მისი თანაგუნდელი მაიკ აპელი 1972-75 წლებში ბრიუს სპრინგსტინის მენეჯერი და მისი პირველი სამი ალბომის თანაპროდიუსერი იყო.
საკსი ჯულიარდის სკოლაში სწავლობდა, 1970 წელს კი მანესის მუსიკის კოლეჯი დაამთავრა. როგორც აუდიო პროდიუსერი, ის თანამშრომლობდა CBS-თან, RCA Records-სა და Sony-სთან. 1980-იანებიდან კი მუშაობა მეტროპოლიტენ ოპერაში დაიწყო, სადაც ჩაწერა და გამოსცა 1600-ზე მეტი ტელე- და რადიოწარმოდგენა.
1977-2018 წლებში საკსი 53-ჯერ იყო წარდგენილი გრემიზე. 30 სხვადასხვა წელიწადს მას მინიმუმ გრემის ერთი ნომინაცია აქვს მიღებული. 10-ჯერ იყო წარდგენილი წლის კლასიკური პროდიუსერის კატეგორიაში, თუმცა ეს ტიტული მას არასდროს მოუგია.
საკსი ასევე იყო მოყვარული მორბენალი და გარბენილი აქვს ნიუ-იორკის ერთ-ერთი პირველი მარათონები.
მას დარჩა მეუღლე, ორი ვაჟი და სამი შვილიშვილი.
