ესპანურენოვანი მიუზიკლის „ემილია პერესის” ორი სიმღერა იყო წარდგენილი ფილმისთვის შექმნილი საუკეთესო ორიგინალური სიმღერის კატეგორიაში 2025 წლის ოქროს გლობუსზე.
საბოლოოდ გამარჯვება წილად El Mal-ს ხვდა. ჯილდო ფრანგ ცოლ-ქმარს, კამილ და კლემან დუკოლებს, ასევე ფილმის რეჟისორ ჟაკ ოდიარს გადაეცათ.
„ეს ნამდვილი ამერიკული გამოცდილებაა,” – აღნიშნა კამილმა, რომელიც ჯილდოს მისაღებად სცენაზე ავიდა. „სიმღერები პეპლებივითაა, ჩვენ კი პეპლები გვჭირდება, მაშინაც კი, როცა მსოფლიოში გამეფებული კორუფციაა დასაგმობი.”
კამილმა მადლობა გადაუხადა „ემილია პერესის” ვარსკვლავებს, კარლა სოფია გასკონსა და ზოი სალდანას (რომელსაც მანამდე ქალის მეორეხარისხოვანი როლის საუკეთესო შესრულებისთვის გადაეცა ოქროს გლობუსი) El Mal-ის ფილმში გაცოცხლებისთვის. „ზოი და კარლა, El Mal არ იქნებოდა ის, რაც არის, თქვენი შესრულების გარეშე,” – თქვა კამილმა. „თქვენ ჩვენს სულებს შეეხეთ.”
El Mal-თან ერთად ფილმისთვის შექმნილი საუკეთესო სიმღერის კატეგორიაში წარდგენილი იყო სიმღერები: Mi Camino ასევე „ემილია პერესიდან”, Beautiful That Way ფილმიდან The Last Showgirl, Compress / Repress ფილმიდან Challengers, Forbidden Road ფილმიდან Better Man და Kiss the Sky ფილმიდან The Wild Robot.
ჯილდოს გარეშე არ დარჩენილა Challengers, რომელმაც ოქროს გლობუსი საუკეთესო ფილმის საუნდტრეკის ნომინაციაში დაიმსახურა.
„ემილია პერესი” კი ჯამში რვა კატეგორიაში იყო წარდგენილი, მათ შორისაა ქალის მეორეხარისხოვანი როლის საუკეთესო შემსრულებელი, რომელშიც ზოი სალდანამ გაიმარჯვა. ნომინაციაში ამავე ფილმისთვის სელენა გომესიც იყო წარდგენილი.
