დადასტურდა, რომ Spider-Man-ის ვარსკვლავები ზენდეია და ტომ ჰოლანდი დანიშნულები არიან. ჟურნალმა People-მა დაადასტურა, რომ 28 წლის მსახიობები ოჯახის შექმნისათვის ემზადებიან. წყაროზე დაყრდნობით მედია იუწყება, რომ ტომ ჰოლანდმა ზენდეიას ხელი სადღესასწაულო პერიოდში, ოჯახის გარემოცვაში სთხოვა. ეს ახალი ამბავი პირველად TMZ-მ გაავრცელა.
ზენდეიას და ტომ ჰოლანდის ნიშნობის შესახებ ჭორები კიდევ უფრო გამძაფრდა მას შემდეგ, რაც გულშემატკივრებმა შეამჩნიეს, რომ Dune-ის ვარსკვლავი 2025 წლის ოქროს გლობუსის დაჯილდოებაზე დიდი ბრილიანტის ბეჭდით გამოჩნდა. როგორც პრესამ აღნიშნა, ბეჭედი სავარაუდოდ Jessica McCormack-ის 5.02-კარატიანი ბრილიანტის ნაკეთობა იყო.
თავიანთი ურთიერთობის შესახებ პრესასთან ჰოლანდი და ზენდეია კომენტარებს ყოველთვის ერიდებოდნენ. ჯერ კიდევ 2023 წლის სექტემბერში ზენდეიამ ნიშნობის შესახებ გავრცელებული ხმები უარყო. ამ შემთხვევაშიც ეჭვი მას შემდეგ გაჩნდა, რაც მსახიობის თითზე დიდი ბეჭედი შენიშნეს.
ზენდეიასა და ტომ ჰოლანდის ურთიერთობის შესახებ მედიამ 2021 წლის ივლისში აუწყა მკითხველს. ინტერნეტში გავრცელდა ფოტოებიც, რომლებშიც მანქანაში მსხდომი ვარსკვლავები ერთმანეთს კოცნიდნენ. წყვილმა ურთიერთობა იმავე წელს Instagram-ზე გამოქვეყნებული ფოტოთი დაადასტურა.
წყვილი ერთმანეთს ოთხი წლის განმავლობაში ხვდებოდა. ჰოლანდმა ცოტა ხნის წინ ჟურნალ Men’s Health-თან საუბარში ახსნა, თუ რატომ არ ხედავენ წყვილს ხშირად ერთად წითელ ხალიჩაზე. „ეს ჩემი მომენტი არ არის, ეს მისი მომენტია და თუ ერთად მივალთ, ეს ყველაფერი უკვე ჩვენ შესახებ იქნება,“ – აღნიშნა ჰოლანდმა ჟურნალთან ინტერვიუში.
ჰოლანდს და ზენდეიას ნიშნობის შესახებ ინფორმაცია თავად ჯერ ოფიციალურად არ დაუდასტურებიათ. Billboard-მა ორივე მსახიობის წარმომადგენელს კომენტარისთვის მიმართა. აღსანიშნავია, რომ ზენდეიას და ტომ ჰოლანდს მაყურებელი უახლოეს მომავალში კვლავაც სამსახიობო პარტნიორების ამპლუაში იხილავს. ისინი ეკრანზე მეტ დეიმონთან ერთად გამოჩნდებიან რეჟისორ ქრისტოფერ ნოლანის ეპიკური პოემის – The Odyssey-ის ადაპტაციაში.
