Post Malone შობის წინა ღამეს ტეხასში, მშობლიურ მხარეში იმყოფებოდა, რა დროსაც ჰიუსტონის ბარს ესტუმრა. ოსტინ პოსტმა, რომელიც სასცენო სახელით Post Malone არის ცნობილი, ერთ-ერთ ბარმენს 20, 000 დოლარის ოდენობის „თიფი” დაუტოვა.
ბარმენი 36 წლის მარტოხელა დედა რენე ბრაუნია, რომელიც Music Mayhem-ის გამოცემასთან აღტაცებით აღნიშნავს, რომ დღესასწაულზე, როცა ყველა ისვენებს, ცხრა წლის ქალიშვილის დატოვება მოუწია, რადგან სამუშაოდ წასვლა უწევდა, ეს “შობის სასწაული” კი მისთვის ნამდვილად მოულოდნელი აღმოჩნდა.
“როდესაც შობის წინა ღამეს სამუშაოდ მივდიოდი, სევდიანი და მოწყენილი ვიყავი, რადგან ჩემი პატარა გოგონა უნდა დამეტოვებინა. ვერ ვაცნობიერებდი, რომ ღმერთი შობის სასწაულს მომიგზავნიდა. ეს იყო ყველაზე თავმდაბალი და კეთილი ცნობილი ადამიანი, ვისაც ოდესმე შევხვედრილვარ. შობისწინა ღამეს მან ჩემი ცხოვრება შეცვალა და ამისთვის სამუდამოდ მადლობელი ვიქნები, მადლობა დიდი, ოსტინ!” – აღნიშნავს ბარმენი გამოცემასთან.
„ამ ყველაფერმა საშუალება მომცა ქირა გადამეხადა და ცოტა დამეზოგა, ვცდილობ, თანხა ბიზნესის ასაწყობადაც დავაგროვო, რათა აღარ მომიწიოს ორ სამსახურში ერთდროულად მუშაობა და მეტი დრო გავატარო შვილთან. ყველაფერი ძალიან რთული იყო, ეს კი ნამდვილი შობის მადლია, რომელსაც სიტყვებით ვერ გამოვხატავ.” – ამბობს რენე ბრაუნი.
ეს ამბავი მაშინ მოხდა, როდესაც Post Malone-ის ჰიტად ქცეულმა ალბომმა F-1 Trillion ჩანაწერების ინდუსტრიის ასოციაციის პლატინის სტატუსი მიიღო. გარდა ამისა, ალბომის სინგლმა ბილბორდ Hot 100-ში №1 პოზიცია დაიკავა. სიმღერამ I Had Some Help, რომელიც მორგან უოლენთან ერთად შეიქმნა, ჩარტში ექვსი კვირა გაატარა – ხუთმაგი პლატინის სერტიფიკატი მოიპოვა, ხოლო მისი ბლეიკ შელტონთან თანამშრომლობა სიმღერისთვის Pour Me a Drink, პლატინის სტატუსით დაჯილდოვდა.
გრემის დაჯილდოებაზე Post Malone შვიდი ნომინაციითაა წარდგენილი, მათ შორის საუკეთესო ქანთრი ალბომი, საუკეთესო ჩანაწერი, ასევე საუკეთესო ქანთრი სიმღერა და საუკეთესო ქანთრი დუეტი სიმღერისთვის I Had Some Help.
