Billboard
8 January, 2025
ღონისძიებების სერიას 18 იანვარს აინე მერმე გახსნის.
„მუსიკოსები მუსიკოსებისთვის” – ასე ჰქვია საქველმოქმედო მუსიკალური საღამოების სერიას, რომელიც 18 იანვრიდან „ეარის” სივრცეში გაიმართება. უკვე ცნობილია პირველი ღონისძიების სტუმარი – მუსიკოსი და მწერალი აინე მერმე. ინიციატივის მიზანია, შემოსული თანხით დაეხმაროს იმ მუსიკოსებს, რომლებიც საქართველოში ბოლო დროს განვითარებული მოვლენების შედეგად დაზარალდნენ. ინფორმაციას ამის შესახებ „ეარი” სოციალურ ქსელში ავრცელებს:
„ყოველთვის, როცა საზოგადოების რომელიმე ნაწილს დახმარება სჭირდება, მუსიკოსები უანგაროდ ერთვებიან ამ საქმეში, უკრავენ საქველმოქმედო კონცერტებზე, ავრცელებენ ინფორმაციას და აქტიურად მონაწილეობენ პროცესებში. ახლა ის დროა, როცა მიმდინარე მოვლენების ფონზე, მრავალი ფაქტორის გამო, მათაც სჭირდებათ დახმარება. ამიტომ ვიწყებთ ლაივ საღამოების სერიას „მუსიკოსები მუსიკოსებისთვის“. შემოსული თანხით გვერდში დავუდგებით როგორც მუსიკოსებს, ისე ბოლო დროს დაზარალებულებს. ერთად ყველაფერს შევძლებთ!” – ნათქვამია გავრცელებულ განცხადებაში.
სივრცის სიმცირის გამო, მუსიკალურ საღამოზე დასასწრები ბილეთები შეზღუდულია. ღონისძიებაზე დასწრების მსურველები „ეარს” პირადად, სოციალური მედიის არხებით უნდა დაუკავშირდნენ.
