მენდი მური იმ ათასობით ადამიანთა შორისაა, ვინც ლოს-ანჯელესში გაჩენილი გამანადგურებელუ ხანძრისგან დაზარალდა. ვარსკვლავმა ინსტაგრამზე ვიდეოები და ფოტოები გააზიარა, რომლებიც მიყენებულ ზარალს ასახავს.
„მიყვარხარ, ალტადენა! მადლიერი ვარ, რომ ჩემი ოჯახის წევრები და შინაური ცხოველები დროულად გავიყვანეთ გუშინ ღამით, სანამ ძალიან გვიანი იქნებოდა. დიდი მადლობა მეგობრებს, რომლებმაც ტანსაცმელი და პლედები მოგვიტანეს,“ – დაწერა მურმა 9 იანვარს და დაურთო ვიდეოები, რომლებშიც კვამლსა და ცეცხლში გახვეული სამეზობლო დასახლება ჩანს. „თავზარდაცემული ვარ იმის გამო, რაც ამდენმა ადამიანმა დაკარგა, მათ შორის ჩემმა ოჯახმა. ჩემი შვილების სკოლა აღარ არსებობს. ჩვენი საყვარელი რესტორნები განადგურებულია. ბევრმა მეგობარმა და ახლობელმა ყველაფერი დაკარგა. ჩვენ გარშემო მყოფები თავზარდაცემულები არიან, მაგრამ აქ ვიქნებით, რომ ყველაფერი ერთად აღვადგინოთ. სიყვარულს ვუგზავნი ყველა დაზარალებულს და იმ ადამიანებს, ვინც სიტუაციის კონტროლს ცდილობს.“
მურმა მეორე დღეს კიდევ რამდენიმე ფოტო გამოაქვეყნა, ამჯერად საკუთარი უძრავი ქონების ამსახველი. „ჩვენ მოვახერხეთ ადგილამდე მისვლა, რათა დანაკარგი შეგვეფასებინა. გასაოცარია, მაგრამ ჩვენი სახლის ძირითადი ნაწილი ისევ დგას. საცხოვრებლად გამოუსადეგარია, მაგრამ უმეტესად მთლიანია. ვისაც ვიცნობ, ყველამ ყველაფერი დაკარგა. ჩვენი ქუჩის ყველა სახლი განადგურებულია,” – წერს მენდი მური. „გადარჩენის გამო უცნაური დანაშაულის გრძნობა მაქვს. ყველა აქ მაცხოვრებელი ჩემთვის ძვირფასია და ყველაფერს გავაკეთებთ, რომ მათ მხარი დავუჭიროთ. მადლობა ყველას, ვინც მოგვიკითხა და დახმარება შემოგვთავაზა. ალტადენა ძლიერია,“ – ვკითხულობთ ვარსკვლავის პოსტში.
იხილეღ მისი პოსტი აქ.
მენდი მურს შეუერთდა რამდენიმე ვარსკვლავი, რომლებმაც ასევე დაკარგეს სახლები ან მნიშვნელოვანი ზიანი მიიღეს, მათ შორის არიან ჯენე აიკო, პერის ჰილტონი, ანა ფარისი, ლეიტონ მისტერი, ადამ ბროდი და სხვები.
ლოს-ანჯელესში ამ კვირას რამდენიმე ხანძარი გაჩნდა. მათი გავრცელება და გაძლიერება ძლიერმა ქარებმა განაპირობა. ბუნებრივი კატასტროფის გამო 200,000-ზე მეტი ადამიანის ევაკუაცია გახდა საჭირო. ქალაქის დასავლეთ ნაწილში, პალისადესის ხანძარმა 4,000-ზე მეტი ჰექტარი მოიცვა, ხოლო აღმოსავლეთით გაჩენილმა ხანძარმა ასევე სრულად გადაწვა იგივე ფართობის ტერიტორია. 8 იანვარს სახანძრო ბრიგადები ასევე ებრძოდნენ სანსეტის ხანძარს ჰოლივუდის მთების მიმდებარედ, სადაც ცეცხლმა ბუნებრივი საფარის დიდი ნაწილი გაანადგურა.
