ისლანდიელმა მუსიკოსმა ბიორკმა ტურნეებზე საუბრისას აღნიშნა, რომ ისინი საკმაოდ დამღლელია. მან განმარტა, როგორ მოახერხა თავისი მიმდინარე ტურნეს განრიგის ისე დაგეგმვა, რომ მის მიღმა რეალური ცხოვრების საშუალება ჰქონდეს.
ბიორკი 1993 წლის ალბომის, Debut-ის გამოსვლის შემდეგ, თითქმის ყოველწლიურად მართავს კონცერტებს. The Guardian-თან ინტერვიუში მან გაიხსენა ტურნეებისადმი თავისი დამოკიდებულების ცვლილება, რაც 2011 წლის მეშვიდე ალბომის, Biophilia-ს გამოსვლის შემდეგ დაიწყო. სტანდარტული მეთოდის ნაცვლად, რომელიც ერთ კვირაში ან თვეში რამდენიმე ქალაქის მონახულებას გულისხმობს, ბიორკმა სხვა მიდგომა აირჩია. ის სხვადასხვა ქალაქში უფრო ხანგრძლივი დროით რჩება.
არტისტის განმარტებით, ამან გამოსვლებს შორის დრო მეტად გაზარდა და ქალებშიც დიდი დროის გატარების საშუალება მისცა. მაგალითად, Cornucopia-ს ტური ნიუ-იორკში 2019 წლის მაისში დაიწყო და ერთი თვის განმავლობაში რვა შოუს მოიცავდა. ტურნე 2023 წელს საფრანგეთში დასრულდა და ამ დროის განმავლობაში ბიორკმა 45 კონცერტი ჩაატარა. შოუებს ასევე თან ახლდა მის პროექტზე, Björk Orkestral-ზე მუშაობა, რომელიც 2021-2023 წლებში 20 კონცერტს მოიცავდა.
„მუშაობის დეტალები უფრო მოქნილი გახდა. შეიძლება, ქალად ყოფნას ვცდილობ, ან, რაც გნებავთ, ის დაარქვით,” – უთხრა ბიორკმა გამოცემას. „მოზარდობის წლებიდანვე ფრთხილად ვებრძოდი იმ წესს, რომლითაც ვიდეოების გადაღებები და ტურნეები იგეგმებოდა – „მოდი, ახლა 18 საათი ყოველდღე ვიმუშაოთ, სანამ ყველა ავად არ გავხდებით.” მე ყოველთვის მსურდა [პირადი ცხოვრების და კარიერის] თანაარსებობა. შესაძლებელია, რომ პირადი ცხოვრებაც გქონდეს,” – ამბობს ბიორკი The Guardian-თან ინტერვიუში.
ბიორკის უახლესი ალბომი, სახელწოდებით Fossora, 2022 წლის ბოლოს გამოვიდა და Björk Orkestral-ის პროექტის ტურნეს საბოლოო ეტაპს დაემთხვა. 2024-მა წელმა არტისტის ტურნეების განრიგი ოდნავ შეცვალა, რადგან წელს არტისტმა მხოლოდ DJ სეტები ჩაატარა. ბიორკი მსმენელის წინაშე ხუთ ქვეყანაში ექვსი მუსიკალური სეტით წარდგა.
